曼聯防線多甩漏,責任誰屬?

黃足坑 於 30/09/2020 發表 收藏文章
上星期白禮頓對曼聯一戰,白禮頓全場極多攻勢,從比賽過程睇,白禮頓先係值得攞三分嘅一隊,相信好多球迷都同意。當中曼聯防守表現引人垢病,令主隊可以連番製造機會。筆者簡單歸納咗曼聯幾個防守問題,希望大家了解紅魔當中有咩出錯之處,順便為各位曼聯捉下戰犯。

首先,曼聯一對中堅企位出錯。下半場一開波,白禮頓球員後場將個波大腳踢俾干奴利。連迪路夫企位前過麥佳亞好多,甚至比普巴更前。一前一後嘅中堅組合唔能夠裝越位之餘,亦好容易失位。白禮頓長傳到曼聯後場偏右位置。由於右中堅連迪路夫上咗去,趕唔切落返嚟,麥佳亞亦唔夠快包位,最後由普巴一個疑似犯規嘅動作破壞對方攻勢。曼聯一向都唔係打高壓逼搶,白禮頓上半場都係將波踢去中堅身後方,而唔係俾身型矮小嘅干奴利直接爭頂。究竟連迪路夫壓到咁前嘅目的係咩?

第二,防線欠積極。比賽大約二十分鐘,托沙喺禁區頂攞到波,當時有六名曼聯球員喺托沙附近,包括三名後衛。當中冇一位球員願意殺出去搶托沙腳下球,令佢有足夠時間轉身,睇定再射波。迪基亞之後都即刻開聲鬧,就係覺得後衛唔應該俾托沙起腳。其實自摩連奴執教後,曼聯防線經常出現呢種情況,寧願縮入自己禁區,但往往為對方增加射門機會。

下半場呢一下同樣,幕比喺禁區頂,費特同般奴費南迪斯都未能成功搶斷。其實馬迪企前一步已經可以包位,偏偏佢選擇留喺自己禁區,令幕比有時間修正,最後更加可以起腳。呢球當然要讚幕比一對六都射到波。不過,其實當時白禮頓只係有二位球員喺曼聯禁區,係咪真係需要四位球員聯防呢?

第三,曼聯眾將欠防守意識。24分鐘白禮頓一個角球攻勢,輾轉之下干奴利射門撻Q,皮球落喺托沙腳下,托沙傳中一刻,幕比同韋士打喺前柱無人看管,兩人基本上可以任頂。雖然呢個攻勢被判傳中前出界,亦顯露曼聯球員防守欠積極,只顧舉手。有踢開波都知道,呢啲情況唔應該當個波出咗界,而要繼續防守。

之後林迪搏得十二碼,林迪推進時,梳爾同般奴費南迪斯兩個守一個,除非林迪有神來之筆,連過兩關,兩人理應守得住。林迪大步推一下,梳爾理論上已經包到,但係般奴喺禁區內推低林迪。不過般奴始終係中前場球員,防守經驗唔係太多,雖然失波但呢個問題相對較細,可以原諒。另一方面,呢個攻勢可以見到白禮頓想透過轉邊去爭取空位,詳情稍後再講。

又好似76分鐘呢一個攻勢,托沙同幕比一個撞牆,前者成功吸引雲比沙卡同馬迪,將佢哋拉離原有位置,令曼聯右邊禁區曝露好大空位。俾馬治成功射門,可惜射得比較差。呢球要留意格連活特嘅位置。本來格連活特有回防看守馬治,不過馬治完成第一腳傳波後,佢就冇再留意馬治去向。

然後到戲肉喇。白禮頓從右將個波轉到左翼衛嘅馬治,馬治喺禁區入面竟然冇人看管。位置上,馬治應該由雲比沙加防守。而雲比沙加聯同麥佳亞睇住企喺十二碼點嘅干奴利,至於連迪洛夫充就追住幕比,後者速度快,追唔到都冇辦法。馬治冇人看管嘅原因係白禮頓踢緊3-4-3陣式,而曼聯用上四後衛,本身已經要跟住白禮頓前場三位球員,馬治應該要靠曼聯中前場球員回防補位。不過,鏡頭只係見到拉舒福特喺禁區頂睇波。

75分鐘,白禮頓有一個三打四機會,右路查漢巴殊右路轉俾左路托沙,幾乎相同位置,托沙都係冇人看管,又睇返雲比沙加喺邊,原來較早前被幕比引咗上前場,白禮頓成功解除逼搶後,兩下長傳,曼聯後防就曝露好大缺口。

79分鐘,同一問題。右邊林迪傳中,馬治無人看管。雲比沙卡移入中間跟住白禮頓前場三人,格連活特喺禁區外睇波。同樣係因為陣式問題走漏馬治,曼聯多次中伏都未有調整。筆者整圖嗰陣,開始覺得啲片段重重覆覆。

83分鐘,曼聯用拜利換入格連活特,轉打五後衛。喺缺點早已表露無違下,呢個換人嚟得有啲遲,不過算喇,遲到好過冇到。五後衛理論上可以解決之前嘅人數問題,雲比沙加可以放心「照顧」馬治。不過佢仍然企喺球場中間位置,放生馬治。去到呢度,曼聯已經冇得賴係戰術問題。雲比沙加毫無疑問失位,其他球員都冇提水。而就算呢個波唔係斬俾馬治,而係俾十二碼點嘅幕比,雲比沙加都難保可以攝贏。

去到95分鐘,雲比沙加見到般奴去防守馬治,所以自己冇跟落去,不過般奴冇意欲同馬治搶點,被馬治輕鬆處理。呢球唔可以入晒雲比沙加數,般奴都有唔少防守責任。

總結
只講防守,雲比沙加係連番失位,蘇斯克查戰術錯配,其他球員都有不足。曼聯防守差唔係一個人嘅問題。呢場失兩球算少,唔好彩嘅話曼聯一早被人大炒。筆者唔係曼聯球迷,不過睇呢場波都睇到嬲嬲地,有部分問題更唔止係呢場比賽先出現。佢哋有上到下防守都出錯,睇嚟要一段好長時間先可以改善。

如果喜歡我們的文章,請即分享到︰

標籤: 曼聯  白禮頓  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→