曼城簽美斯真係好?

黃足坑 於 26/08/2020 發表 收藏文章
星期三凌晨,突然傳出消息指,巴塞球皇美斯要求離隊。事件一出當然喺網絡世界引起牽然大波,喺事件傳出後嘅12小時,社交網站Twitter已經有超過一千萬關於美斯嘅帖文。各大豪門都有意簽下美斯,甚至忙於計數研究佢哋財政上係咪可以將佢收歸旗下。綜合各大媒體消息,暫時曼城簽入美斯嘅機會最大。
依筆者看來,曼城吸引美斯嘅原因有二:
一:領隊哥迪奧拿係美斯嘅恩師,哥帥由2008年到2012年執掌巴塞,成功奪得三屆西甲,兩屆歐聯以及各大盃賽。呢段時間唔單止令巴塞獲得地上最強嘅稱號,又將Tiki-Taka發揚光大。不但令巴塞獲獎無數,更間接協助西班牙國家隊喺呢段時間稱霸,獲得兩次歐國盃同一次世界盃。至於美斯,雖然唔係西班牙人,但哥帥同樣為佢四奪金球獎寶座。事到如今已經超過十年,哥帥先執教過拜仁,再掌曼城教鞭。每隊波嘅戰術都有調整,但係短傳丶猜波同走位嘅主體冇變。美斯唔難適應曼城打法,甚至曼城會因佢嘅來臨而為佢調整戰術,哥帥得到美斯,進攻時亦會得心應手。
二:曼城前鋒阿古路係美斯老友,佢哋自2005年已經認識。因年紀相近,二人由U20一齊踢到大國腳。往後大大小小嘅國家隊比賽,兩人都會住同一間房。球場上,雖然阿根廷國際賽成績唔太突出,但佢哋總算一齊奪得世青盃同奧運。球場外,阿古路可能係美斯國家隊中最好嘅朋友。可以喺球會都一齊,係美斯過去曼城嘅誘因。
一個係世上數一數二嘅進攻天才,一隊係英超攻力最強球隊,兩者看來一拍即合,但事實係咪真係咁?

英超係一個體力化嘅聯賽,不論係賽程密度定係球隊踢法,都要求球員跑動甚多。美斯絕對唔係呢種球員,加上哥帥奉行「六秒反搶」,要求失波後前場壓逼,盡快重新取得控球。反觀巴塞大敗巴塞一役,雖然中後場失誤,唔可以將所有責任歸究於最前嘅美斯,但係美斯莫講逼搶,連遮線都欠奉。十年前嘅美斯或者做到哥帥嘅防守要求,今日嘅佢就好難了。如果想美斯唔使參與回防,曼城中場必需一人行多一步,佢哋需要干堤呢種防中。反觀曼城而家只有費蘭甸奴同洛迪兩名防中。前者已經三十有五,有時仲要客串中堅;洛迪亦唔屬於走動多嘅類形。假設美斯嚟到踢右翼,右閘獲加來年可能面對更多以一對二嘅情況。曼城今年好多波都係輸反擊,假如美斯加盟,相信只會有增無減。正如頭先提到,藍月亮係英超攻力最強球隊,上年曼城進攻並無大問題,再加強進攻帶嚟嘅邊際效益不大,反而加大球隊喺防守方面嘅壓力。

儘管大部份人只提及山齊士同普巴等人如何高薪厚職,美斯其實係最高人工嗰個。據報,美斯上年只係底薪已達六千萬歐元,週薪接近一百萬鎊一年。呢個只係底薪,並唔包括出場費,入波獎金等。呢個數字對任何球隊嚟講都係沉重負擔。我相信美斯離隊同錢無關,但作為世上最佳球員,美斯即使願意減薪,人工都唔會太大。筆者估計美斯人工起碼同C朗(週薪約60萬)睇齊。上年曼城被指違反財政公平條例,今年簽入尼敦艾基同費蘭托利斯已經用上約6000萬鎊,單係美斯人工已經可能令佢哋再次違規,今次會唔會又罰錢了事?筆者對此有所保留。
如果美斯真係去曼城,可以預計佢踢右翼或進攻中場位置,以佢身價估計,佢係球隊必然正選。問題係曼城喺呢啲位置已經有充足人手:馬列斯丶貝蘭度施華丶科頓丶費蘭托利斯,甚至根度簡都係位置相同嘅球員。上季,馬列斯同科頓等人已經對自己上陣時間略有不滿。美斯加盟之會進一步減少佢哋出場機會,亦可能因此提出離隊。然而,美斯已經33歲,雖然技術仍在,體能無疑已每況愈下,隨時踢多兩年就會離開;反觀科頓同費蘭托利斯分別只係19同20歲,如果呢兩年缺乏出場機會,好影響佢哋日後發展。美斯可以帶嚟即時嘅得著,但對長遠發展未必係好事。

無可否認,美斯放風離隊已經令互聯網地震,如果最後真係轉會,一定會令新東家喺球會知名度同品牌價值方面大大提升。但我認為美斯對曼城嚟講係一面雙刃劍。佢喺頂級足球嘅生涯已經步入晚年。如果對佢過份依賴,曼城只會成為下一隊巴塞。

如果喜歡我們的文章,請即分享到︰

標籤: 美斯  巴塞  曼城  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→