巴沙克舒希:可能係土超最唔受歡迎球隊

黃足坑 於 20/10/2020 發表 收藏文章
講起土超,最先諗起嘅定必係土耳其Big 3—加拉塔沙雷丶比錫達斯同費倫巴治。喺64個球季入面,呢三支球隊合共攞咗56次。因此,以往歐賽好多時都會見到佢哋。每當愛隊要作客土耳其,第一時間諗到嘅係超級狂熱嘅球迷。土超主場經常被球迷搞到火光熊熊,所以有喺歐戰佢哋成日被冠以地獄主場嘅稱號。
圖:費倫巴治球迷

然而,上季嘅土超冠軍,巴沙克舒希(İstanbul Başakşehir),並唔係來自Big 3球隊,呢隊波嘅平均入場人數只得二千八百幾,同一般土超球隊大相逕庭,客隊球迷人數經常比主隊球迷多。佢哋又唔係好似李城嗰種奇蹟奪冠,反之佢哋財雄勢大,上年有羅賓奴丶丹巴巴亞,基捷基治丶艾達杜蘭等球星效力。佢哋咩都有,唯一冇嘅就係球迷。
巴沙克舒希前身叫做İstanbul Büyükşehir Belediyespor,同Big 3一樣,都係嚟自伊斯坦堡。佢哋喺1990年創立,由業餘球隊開始打起,去到2006/07球季,佢哋成功衝上土超,喺土超最高試過排第六,最後喺2012/13球季降班,但係一季球就以冠軍姿態上返嚟。

再次升班後,呢支球隊成功賣盤,同時係佢哋成為最黑人憎球隊嘅開始。新嘅班主係土耳其正義與發展黨,現今土耳其總統埃爾多安都係嚟自呢個黨。佢哋將球隊改成而家嘅名,並將主場移到伊斯坦堡內嘅巴沙克舒希區。呢個區係城內最支持正義與發展黨嘅地區之一。球隊顏色:橙同藍,同正義與發展黨配色不謀而合。此外,巴沙克舒希嘅贊助商被指同正義與發展黨有好大關係。以心口贊助土耳其航空為例,政府持有75%股權。

如果有留意土耳其政治嘅朋友,應該知道土耳其而家行緊強人政治,埃爾多安擁有極多權力,同政黨有關係嘅商家,即係同政府有關係,反之亦然。巴沙克舒希班主正正就係正義與發展黨,土耳其人都認為呢支球隊部份班費係出自納稅人身上。納稅人係邊個?入面包括土超Big 3球迷,用佢哋嘅錢資助一支唔屬於佢哋嘅球隊,自然引起球迷莫大反感。

巴沙克舒希新主場開幕戰係一場慈善賽,當中代表巴沙克舒希上陣,年屆六十多歲嘅前鋒埃爾多安射入三球,大演帽子戲法之餘,巴沙克舒希亦將埃爾多安身穿嘅12號波衫退役,以表揚埃爾多安嘅貢獻。球隊嘅訓練場同設施亦有掛起埃爾多安嘅畫像,佢哋毫不掩飾自己同總統嘅關係。

巴沙克舒希今晚會首次喺歐聯分組賽亮相,諷刺嘅係,佢哋對手RB萊比錫同樣唔太受德國球迷支持。相比同日其他歐聯比賽,呢場可能係最少人留意嘅賽事。

有曰:敵人嘅敵人就係朋友,巴沙克舒希係土超多隊嘅共同敵人,呢支球隊反而可以令本來敵對氣氛濃厚嘅Big3球迷槍口對外,土耳其政府功不可沒。又有曰:Football without fans is nothing。一隊波就算成績幾好,冇球迷嘅支持,就好似冇咗靈魂一樣,就算以後佢哋連贏N屆土超,佢哋嘅重要性都唔會比得上Big 3。相比起一支冇靈魂嘅球隊,筆者更加希望睇到一支有歷史丶有自己文化嘅球隊。

如果喜歡我們的文章,請即分享到︰

標籤: 土超  歐聯  巴沙克舒希  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→