富咸又升班,呢次會唔會重蹈覆轍?

黃足坑 於 11/09/2020 發表 收藏文章
今年英超三隊升班馬中,我哋又再見到富咸嘅身影。點解我咁講?因為富咸近年成為咗英超升降機:兩年前(18/19球季)升班,上年落返英冠,今年喺少帥柏加帶領下,又上返嚟。

還記得兩年前富咸一升班,就喺轉會市場大灑金錢,招得多名球員加盟,例如米杜域,施利等,共花費超過一億鎊。又借入舒賀爾尼同維圖等人,眾人對富咸陣容,尤其中前場組合都充滿期望。但係去到季尾,大家就知道結果不似預期。頭先提到嘅球員難以磨合,加上防線不穩,富咸成為當季英超失波最多,入波第二少嘅球隊,排尾二降班。

汲取教訓後,富咸今個轉會較上次收儉,以下為今季富咸嘅新球員:
迪迪(右閘,從里昂買入)
利文拿(中場,從修咸頓借入)
羅賓遜(左閘,從韋根買入)
艾路拿(門將,從PSG借入)

另外富咸將本來借入嘅列特同諾卡特買斷,六位球員共花費約2500萬鎊。

喺買人較少下,相信富咸隊中適應問題可以避免,唔會重蹈上次覆轍。佢哋要面對嘅問題就係,以英冠陣容為骨幹嘅佢哋,球員質素上能否喺英超立足?我嘅答案係:否。

先講講富咸嘅進攻,可以預計富咸前線由米杜域,諾卡特同艾雲卡華尼路拍檔,由前者作支點,交俾後兩者邊線發揮。米杜域喺英超有一定級數,前季為富咸射入11球,15/16球季為紐卡素亦射入9球,喺下游球隊嚟講實屬不俗;諾卡特成為英冠升班大使,曾為李斯特城同白禮頓升上英超,但去到英超則表現較差,生涯總共喺英超上陣三季,只係入咗五球,後來喺李城同白禮頓都不受重用,可見佢實力有限。艾雲卡華尼路情況亦類似,暫時未喺英超證明過自己。
米杜域係隊中射手,我認為來季都係靠佢做主要得分點。

中後場方面,其實大部份人都喺英超上陣過,但都係表現平平,例如中場核心湯卡尼,雖然被球迷冠以英冠迪布尼之稱,策動進攻之餘亦會協助防守,但前年為富咸挑戰英超時,創造力確實較差,場均只係制造1.69次射門機會,全季亦只交出一個助攻,又例如利文拿,上兩季喺修咸頓表現都唔突出,上年更未能列入一隊,將佢外借到加拉塔沙雷。

後場較為值得注意嘅球員係右閘迪迪,佢上年作為里昂後備右閘,擅長傳中,場均傳中3.8次,交出兩個助攻;防守方面,佢嘅攔截成功率都有52.4%,比法甲班霸PSG任何一位閘位球員都要高。佢轉會費只係280萬鎊,對我嚟講性價比甚高。只不過宏觀睇成條防線,富咸其他球員都係水準一般,祖拜恩同添廉係前季降班正選,失球無數,米高赫陀雖然上季表現出色,但又缺乏英超經驗,有待證明。因此筆者預計富咸失波都會偏多。
新兵迪迪上季對比斯特嘅助攻

相比同樣係升班馬嘅列斯聯,或者上幾季嘅狼隊同紐卡素等,富咸上季喺英冠嘅成績都唔係好突出。佢哋一共入64球,排英冠第7,另外失48球,排英冠第四。令人擔心如此人腳能否應付英超。筆者都有睇幾場富咸嘅英冠比賽,佢哋都主張控球,但面對高一檔次嘅對手,速度同逼搶都有所不同。英冠球隊會俾富咸較多時間喺後場控球,但到英超就係另一回事。所以我唔太睇好佢喺英超嘅成績。我預計佢哋即使唔似上次過度買人,仍然會喺降班區掙扎,護級與否就好睇柏加嘅造化。

如果喜歡我們的文章,請即分享到︰

標籤: 富咸  英超  英冠  升班馬  升班  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→