半場波睇清雪到硬晒嘅加利夫巴爾

黃足坑 於 06/09/2020 發表 收藏文章
嚴格嚟講,加利夫巴爾可以話係失蹤人口之一。雖然大家都知佢仍然係皇馬球員,但係施丹已經唔再重用佢,自從復賽之後,巴爾只係上陣咗兩場比賽,共100分鐘。同施丹越鬧越翻下,巴爾都冇乜意欲為皇馬踢波,加上佢高昂嘅人工,巴爾好大機會留喺皇馬,直到合約結束。其間上陣機會預計寥寥可數。

但係巴爾都唔係完全放棄足球,除咗早前講過,唔介意重返英超外(雖然我唔覺得有人要佢),佢亦有繼續為國家隊上陣。只係佢嘅表現同名氣不乎。日前威爾斯對住芬蘭嘅比賽,身為隊長嘅佢半場就被換走,可想而知踢得麻麻。論場內數據,巴爾唔單止冇入波同助攻,關鍵傳送同傳中次數都係0,半場只有九次成功傳送,全場共有十次失去控球。種種數據都顯示,巴爾喺場比賽入面毫不起眼。而接下來嘅一啲比賽片段會進一步證明呢點。

第一張圖係右翼巴爾嘅Heat Map, 第二張係左翼丹尼爾占士。由於後者比前者踢多半場,觸球次數必然比巴爾多,另一方面可以見到占士更常喺禁區入面,反映佢更多參與進攻,相比下,巴爾喺進攻貢獻較少。

前場壓逼係現今比賽嘅主流,而對住芬蘭,威爾斯亦唔應該只係防守,所以預期領隊傑斯有要求適當程度逼搶。事實上威爾斯左邊有做足逼搶,呢球幾位球員走動同意識都積極,令到芬蘭唔可以將個波運上前場。

至於巴爾身處嘅威爾斯右路,可以見到佢跑動較少,相比下冇右翼丹尼爾占士積極,

本來巴爾嘅殺著之一係速度,隨住年紀大咗,加上太耐冇踢波,巴爾已經唔可以爆過對手,結果呢個傳中輕鬆被對方閘到,整個半場巴爾冇一次成功傳中。

控球技術同樣退化,呢兩下都係出醜於人前。尤其對手芬蘭水平已經唔高,更加顯得巴爾失色。

巴爾半場只係錄得一腳射門,呢球波就晒左腳,推到順下,就算唔入波都應該要射中目標。反觀傳波俾巴爾嘅丹尼爾占士更見速度同活力,值得一讚。

最後威爾斯喺藍斯同祖亞倫落選下,以1:0小勝。賽後傑斯就話,半場換走巴爾係賽前部署,唔知大家睇完巴爾表現後,仲信唔信傑斯嘅講法?巴爾喺國家隊唔係完全冇競爭對手,除咗入替佢嘅哈利威爾遜外,亦有小將活特本,巴爾要盡快重拾狀態,否則要小心正選之位不保。禮拜日九點就係威爾斯今個賽期第二場比賽,會對住保加利亞,又睇下巴爾可唔可以交出表現。

如果喜歡我們的文章,請即分享到︰

標籤: 威爾斯  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→