北倫敦冤家各出奇招 官宣方法創意無限

黃足坑 於 03/09/2020 發表 收藏文章
今個轉會窗最為活躍嘅,莫過於車路士。直到現在已經簽入華拿丶薜耶治丶捷維爾丶沙亞同泰亞高施華。從各界轉會消息睇嚟,佢哋分分鐘已經同其他球員簽下合約,官宣陸續有來。相信車迷對愛隊今個轉會窗嘅評價好高,冇100分都有80。不過論創意同幽默,我就覺得呢兩支球會攞晒分數。
講緊嘅係阿仙奴同熱刺呢兩支北倫敦球會。其實佢哋都有唔少新球員加入,前者收回外借嘅沙列巴,亦簽咗韋利安同加比爾等人,後者就有賀貝治,祖赫特同杜靴迪加盟,風頭雖然未必比得上車路士,但唔經唔覺已經默默補強陣容。其中,熱刺嘅杜靴迪同阿記嘅加比爾,未上場已經喺球迷心中留下唔少印象。
點解?咪就係因為球隊公關囉!話說杜靴迪本身係阿迷,幾年前喺Twitter親口承認,如今加盟死敵,自然要表忠啦,於是公關同事就叫杜靴迪刪除有關帖文,實行「言論審查」,並將佢拍成片,喺官宣時放出嚟。有阿迷睇到條片後玻璃心碎,不過都有唔少富幽默感嘅,就冇所謂,一笑置之。而我呢個唔關事嘅,就當然覺得好笑啦!
大約半日後,阿仙奴正式宣佈加比爾嘅來投。「槍手」就冇以牙還牙,透過官宣同宿敵鍵戰一番。不過佢哋嘅官宣方法都相當新穎。阿仙奴會方安排加比爾嘅同鄉:韋利安同大衛雷斯進行視象對話,由於韋利安都係新槍手,所以就由好朋友雷斯歡迎佢,並寒暄一番。去到片段一半,當球迷以為呢條片只係普通吹水之際,加比爾就「亂入」,由兩個巴西人對話變成三個。可以話成功比球迷一個驚喜,結束「48小時內加盟」嘅等待。有指,因為加比爾仍然係喺隔離當中,唔夠夠拍所謂嘅「官宣片」,逼不得以下就出此下策介紹新球員,不過反應都唔錯呀!
我哋一向睇開嘅官宣都係拍條片介紹球員,如果係名氣唔大嘅,甚至只係簡單一張相就算數,有時覺得呢啲官宣帖文只係一個儀式,唔太重要,不過呢啲場合花多少少心思,算係一種公關手段,可以搏球迷一笑,都係一件好事。如果要鬥公關,德國球會呢方面做得幾好,有機會就再同大家講下。最後,球員場上表現先係最重要,兩位新兵邊個笑到最後,真係落到場先知!

如果喜歡我們的文章,請即分享到︰

標籤: 英超  熱剌  阿仙奴  轉會  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→