介紹返:FC聖誕老人

黃足坑 於 26/12/2020 發表 收藏文章
聖誕節假期,如果要講一個有節日氣氛嘅話題,相信非FC聖誕老人莫屬,就連FIFA官方網站都有介紹呢支芬蘭球隊,所以,筆者呢兩日搜集咗一啲有關呢隊波嘅資料,同大家分享下。

FC聖誕老人位於芬蘭Lapland省入面嘅Rovaniemi市,Rovaniemi市亦都係聖誕老人嘅發源地。1992年,市內兩支第三組別球隊資源同能力都唔夠,所以決定合拼,成立之初,球隊命名為FC Santa Claus Rovaniemi。當時,為咗用「聖誕老人」呢個名,球隊需要得到真嘅聖誕老人同意,慈祥嘅伯伯亦都二話不說地同意,甚至成為球會榮譽會長,有時更加會去睇波。呢支球隊嘅命名非常有商業頭腦,佢哋唔用芬蘭文Joulupukki,而用上英文Santa Claus,明顯地希望用呢個名吸引其他人關注。事實上,佢哋策略都相當成功,Nike,Puma,以及Adidas都先後同FC聖誕老人合作,佢哋亦曾經獲得EA Sports嘅贊助。

1993年,聖誕老人隊正式參加芬蘭第三組別聯賽,其實第三級已經係業餘聯賽,所以代表球隊參賽嘅都唔係職業球員,有部份人嘅正職係幫聖誕老人收信。不過,佢哋第一個球季嘅成績幾好,排第三,只係喺升班附加賽出局,無緣更上一層樓。只係,呢個已經係成軍以來最好嘅成績,之後一直浮浮沉沉,更加喺2000迎嚟年降班。雖然2008年又上返嚟,但係喺2012年又一次降落第四級聯賽。要講到聖誕老人隊最經典戰役,就要數到1997年主場友賽水晶宮,呢場比賽吸引5000人入場,佔市內人口大約十分一,不過被大炒五粒。此外,佢哋曾經去到瑞典參加一個地區盃賽,喺1994年捧盃而回。

2012年,聖誕老人隊除咗降班之外,亦面臨財政問題,之前嘅贊助商一一完約,幸好搵到Nike贊助,球隊得以續命。佢哋改名做FC Santa Claus AC。意大利足球界入面,AC一向解作足球會,而呢度嘅AC就解作北極圈(Arctic Circle),以反映球隊地理位置。2016年,佢哋得到中國資金「必勝體育」入主,中國人加入咗球隊管理層,先後為球隊安排兩場友誼賽:一場對住中國明星足球隊,聖誕老人以1比0贏波。雖然明星足球隊輸波,但係中國方面冇玻璃心碎,反而再次邀請球隊去到中國友賽,對手有退咗休嘅迪比亞路同奧雲,不過我就搵唔到呢場波嘅賽果。返到去芬蘭,聖誕老人隊嘅成績冇好轉到,喺2018同2019年都包尾出局。佢哋今年本應踼第六級聯賽,但佢哋決定索性退出,轉戰八人足球。而球隊嘅德國藉教練就指出年就會回歸11人足球。

相信聖誕老人隊除咗成績之外,同樣希望以聖誕老人之名,為世界各地帶嚟歡樂,所以球隊亦注重慈善,佢哋曾經同UNICEF合作,向有需要嘅小朋友捐贈波衫。今年世界各地受武漢肺炎參集,球隊所在嘅Rovaniemi市都唔例外,本來佢哋好靠遊客收入,今年市內經濟同環境當然變得冷清,不過佢哋依然透過FIFA官網發放正能量,祝願各國早日回歸正常。
loading
loading


大家睇到呢篇文章嘅時候,可能已經係拆禮物日,不過筆者都喺度祝大家聖誕快樂丶聖誕平安!

留言


請按此登錄後留言。未成為會員? 立即註冊
    快捷鍵:←
    快捷鍵:→