萬人空巷睇港超?!

我最期待既聯賽港超聯終於返黎啦! 三場比賽東方對傑志﹑富力R&F對南區﹑理文對愉園都分別係19-21/9上演。雖然得短短兩個禮拜既備戰時間,但六支球隊既表現都唔失禮。不過筆者想講既唔係呢三場波有幾咁精彩,而係想講下呢三場波既觀看人數。

呢三場波既觀看直播人數都係超過一萬人(只粗略計算東網﹑我撐本地波fb page同港超聯fb page)。東方對傑志﹑富力R&F對南區呢兩場係星期六日踢,尚可以當大家放假無野做係屋企睇波。估唔到理文對愉園呢場係星期一office hour踢既波,重要戲碼相對較弱,都有成一萬人睇直播。一萬人睇live係一個咩概念? 筆者認為無任何開網上live既人夠膽話自己連開三日live,都一定可以過萬人睇。

你睇下,幾咁多人睇緊
(source: 香港超級聯賽 facebook page)

如果計總觀看次數,就更加誇張。係筆者寫緊呢篇文既時候,理文對愉園呢場波係"我撐本地波"fb page既觀看次數已經達到8.8萬次。8.8萬次係一個咩概念?以兩個本地出名既足球評論youtuber為例,佢地既片分別係3-6萬觀看次數同1萬觀看次數左右。若果同埋其他界別比,某本地樂隊係8月尾既online concert,到依家係佢地自己個youtube channel既總view數係6萬人左右。如果筆者係比賽前話港超比賽既view數會多過哂佢地,一定比人當痴線佬,但事實就係,呢一輪比賽既view數真係多過哂佢地。

筆者同主辦機構既人探過口風,佢地本身都只係預有5000人睇直播,但依家成一萬人,佢地都好驚訝。筆者認為,係呢一萬人入面,好多都係生客(姐係並無睇問港超既習慣)。以往時為例,如果一場比賽入場人數有2000-3000人,而網上直播有2000-3000人睇,總觀眾人數有6000人已經算係好好既成績。換言之,依家係多左4000人睇港超。

筆者依稀記得,對上一次閉門作賽個排,網上直播觀看人數都係好高。封場前最後一場好似係大埔對富力,個直播又係超過一萬人睇。而個段時間正好係所有歐洲比賽都停哂。筆者懷疑就係有批生客無歐洲波睇,就去左睇港超。但係依家已經有歐洲波睇,佢地都照睇港超復賽,可能因為係港超比賽入面搵到一啲佢地覺得有趣既地方。

主辦機構應該好好把握呢次機會,諗下點樣去留住呢一班新既觀眾,怎至乎令佢地之後買飛入場。如果令到4000人入面有2000人繼續睇,而2000人入面有一半會真金白銀買飛入場,每場既平均入場人數都可以多1000人了。而直播過萬view,總view數有7-8萬,主辦機構或者都可以為港超搵到多啲sponsor?


如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→