淺談富力R&F既亞洲賽資格

亞洲足協(AFC)早前正式通知,富力R&F合資格代表香港參加來屆既亞冠杯或亞協杯賽事。雖然本屆港超的冠軍未有定案,但AFC既決定已經喺唔少港足球迷間引起廣泛討論。因此筆者都想就AFC既決定發表少少意見。

筆者原則上係唔反對亦唔抗拒富力R&F代表香港去踢亞冠杯或亞協杯賽事。簡單啲講,如果可以既話到時會買飛入場睇。好多人話富力R&F係中國球隊,憑咩代表香港踢亞洲賽。但其實富力R&F既組成係以香港球員為主,當中好幾位仲係香港隊既主力,例如新加盟既徐宏傑﹑已經入籍仲踢左港隊好多場既羅拔圖同基奧雲尼。亦都有岩岩入籍既謝家強同準備入籍既林柱璣。新生代既年輕香港球員亦有龍門謝家榮﹑後衛林衍廷同中場林樂勤等等。中國籍既球員其實得門將周煜辰同後衛符雲龍,而後者既出場機會係少之有少。筆者確實諗唔到咩原因唔去支持呢一班香港球員,係亞洲級別既賽事踢出好表現。

徐宏傑(source: https://www.sportsroad.hk/archives/305210 )

筆者明白,好多球迷對於富力R&F呢一隊由中國空降落港超既球隊好反感,但我地不妨理性咁諗一諗,其實富力R&F係咪真係咁差咁不可接受?

好多球迷會批評富力R&F空降港超,做壞規矩。但其實今季備受讚賞既理文同樣都係空降港超,又唔見球迷去批評佢?香港既聯賽一向都有空降球隊,又有自升自降。雖然呢個絕對唔係好現象,但亦都唔能夠用空降呢一個原因去批評單一球隊,因為個問題係出喺個制度。

站係球員立場,富力R&F亦係一隊相當吸引既球隊。因為投資金額極大,球員薪金非常理想。以剛離隊轉投中甲梅州客家既梁諾恆為例,佢離隊前盛傳係本地華人最高薪球員,接近港幣30萬一個月。就算係後備球員,據筆者探聽所得,月薪也有大概3-6萬港元。本地球圈經常被批評為“乞食”﹑“做保安清潔都搵得多過踢波”。依家有隊波願意出天價去簽香港球員,球迷反而係應該為球員覺得高興。

梁諾恆 (source: https://sports.sina.com.cn/china/b/2020-07-16/doc-iivhuipn3280603.shtml)

而且富力R&F既訓練基地設喺廣州,球員可以任何時候都喺真草場練波,唔洗再踢仿草,又唔洗再比康文署阿姐趕,係提升狀態同避免傷患上係非常有幫助。最明顯就係謝家強,以往踢半季傷半季,踢左富力R&F之後就無大傷過仲操返fit,對未來港隊既中後場防守好有幫助。

謝家強 (右, source: https://orientaldaily.on.cc/cnt/sport/20190315/00286_001.html)

富力R&F亦都算一定程度兌現左幫香港球員北上發展既承諾。陳俊樂同梁諾恆都係踢完富力R&F之後加盟中國大陸既球隊。(雖然樂仔係先加盟廣州富力,之後再借返落富力R&F,但有比樂仔返上去踢廣州富力,算係兌現承諾啦。) 筆者亦希望有更多香港球員能夠衝出香港,去其他地方發展。

陳俊樂 (source: https://new.qq.com/omn/20200807/20200807A0VOUV00.html)

而對球迷最直接既影響係,聯賽既競爭性同娛樂性高左。以今季為例,有力爭標既球隊係理文﹑傑志﹑東方同富力。相信球迷都鐘意睇咁緊湊既戰情。

或者有啲球迷會將個焦點放係富力既“特權”到。富力R&F2016-2017第一季參加港超既特權係「註8出3」,註冊8名香港本地球員,每場派出至少3位香港本地球員上陣,其餘為中國球員,不設外援。而係2017-2018球季,富力R&F亦將“主場”由小西灣運動場,搬左上去廣州既燕子崗體育場。但由今個賽季(2019-2020)開始,富力係球員註冊上已經同一般港超球隊接軌,註冊非香港本地球員既數目為(5+1+1),可註冊5名任何國籍外援﹑1名亞洲籍外援同1名中國籍外援,而每場比賽場區上只能出4名非香港本土球員。所以R&F富力既常規正選陣容,除左龍門長期用中國籍外援周煜辰,其他球員都係用香港球員加3名外援。富力依家既特權,其實就只係得返佢個係廣州既燕子崗爛地主場。如果佢將主場搬返落香港,咁筆者認為富力R&F就已經無任何既特權。

其實對於富力R&F既討論,就好似典型既哲學問題“忒修斯之船”,掛住中國球隊既名,但內裡既都係香港球員,咁佢又算唔算係一隊香港球隊呢?

如果喜歡我們的文章,請即分享到︰

標籤: 香港波  港超  亞冠  亞協  富力R&F  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→