巴林之旅小總結

香港隊為期三場嘅世界杯外圍賽正式結束。三場嘅比分係1:3負伊朗、0:1負伊拉克、0:4負巴林。雖然三場比賽都輸哂,但今次世杯外之旅係咪一無是處呢?平心而論,筆者對於呢三場嘅賽果係有啲傷心,但又未至於不能接受。始終今次港隊陣容不整,外流中超﹑中甲既主力球員都因FIFA最新既隔離政策而未有入選。
(source: HKFA facebook)

講左筆者覺得今次港隊表現得好嘅地方先啦。一如以往,香港隊防守紀律性非常之高,面對三支世界排名比自己高好多嘅球隊,都能夠令對手好長時間老鼠拉龜,無法係中路組織到具威脅攻勢。伊朗所入嘅三球,有兩球都係省中人改變方向彈入;伊拉克就更加無咩危險攻門,只係靠馮慶燁嘅驚世老烏贏波;巴林係上半場就更加係一個似樣嘅攻勢都無(下半場另計)。能夠保持住自己嘅優勢,呢一點係值得稱讚。另一個有明顯改善嘅地方就係進攻。能夠係伊朗身上入到一球,好多亞洲“強國”都做唔到。雖然只係破蛋,但都要球員夠膽組織攻勢,夠膽埋門先入到波。(雖然全世界都唔知點解個波會去左伊朗中後場,因為直播掛住播playback)。對巴林嘅上半場,更加可以話係令人眼前一亮。雖然都係主守,但三防中無再縮到係禁區頂,而係主動係中圈對落嘅位置同對手埋身肉搏。搶到控球之後唔再係盲目解圍,而係搵最前嘅支點安永佳。安永佳停到個波之後,兩翼羅梓俊同鄭兆均就後上支援。睇落好簡單基本,但非常有效。香港隊上半場嘅角球數重多過巴林,係禁區入面又有兩次具威脅攻門,一次中龍一次唔中龍。而今次最令人驚喜既球員相信係安永佳。係本地聯賽靠“屈頭”頂入好多波嘅安永佳,面對高大嘅伊朗守將都依然頂入到一球,證明自己係一個可靠嘅禁區殺手。而且係中鋒位置嘅現位停波、回傳等都做得唔錯,相信係球會跟丹恩奴域學左唔少野。

講完好野,就係時候講唔好。筆者覺得港隊係某啲時候都係踢得太保守。對伊拉克嘅賽事入面,港隊三個防中都縮得太後,差唔多企係對中堅前面,放太多位比對手睇定黎傳。所失嘅一球雖然係馮慶燁嘅烏龍波,但三防中多次任由對手係禁區頂睇定黎斬都要負返一定嘅責任。教練麥柏倫嘅輪換都有啲保守。黃洋、迪高、羅拔圖呢三大長老,差唔多踢足三場。係咁頻密賽事,呢三位年過三十(黃洋、羅拔圖更加係年過三十五)嘅老將係體能方面一定有所下滑。要保持港隊防守專注度同攻防轉換速度,係咪應該要係中場嘅位置上面作出輪換?例如用多啲今季係理文表現出色嘅顏樂楓。而另一個問題,就係心理質素,係攻守兩端都有呢個問題。港隊同巴林上半場互有攻守,但下半場開波無耐失左一球,成隊波就散哂,非常慌亂。陣中嘅老大哥應該係呢啲時候穩定軍心,可惜就連最有經驗嘅黃洋大哥都犯錯。可能港隊以往都係抱住輸少當贏嘅心態去比賽。今場想贏但先失波,球員嘅心態就有啲進退失據。而係進攻方面,雖然上面提到呢三場嘅進攻套路比以往好,但僅限於條form,執行上仍然有好多沙石。最為明顯就係經常面對面交失波。係無壓力之下咁樣失去控球,對球隊嘅攻防都帶黎好大壓力,亦都好洩氣。呢啲失誤並唔係技術嘅問題,而係球員太“騰雞”。可能因為香港隊嘅比賽實在太少所致。
係筆者執筆嘅時候,最業餘嘅亞洲足協(AFC,Amateur Football Confederation)突然宣佈亞洲杯外圍賽多左一個位,香港隊可以用最佳第四名直入外圍賽,唔需要踢多輪附加賽,係有啲好彩。希望香港隊可以好好準備,吸收今次世杯外對呢三隊西亞強隊既經驗,係外圍賽突圍而出。同時亦都希望代表香港出戰亞冠既傑志,代表香港出戰亞協既東方同理文可以爭取到好成績
(source: HKFA facebook page)

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→