【陋室雜談:四條戰線?唔係咁易 ❷ 熱刺篇】

足字室 於 16/01/2019 發表 收藏文章
文:蘭斯貝利

明代劇作家馮夢龍曾寫下一句非常有意思的名句:
「屋漏偏逢連夜雨 ,船遲又遇打頭風。」

英超列強雖則都唔係個個順風順水,
但爭標組中,利物浦連敗兩場後作客贏波止血,牢不可破;曼城重回常態,無堅不摧。
然而第三名的熱刺開季至今,絕對體會到這句說話。
首先,熱刺為了起新球場,夏季轉會窗已經無得買人;點知新球場講到2019年都未開張,因為工程有延誤,又漏水又安全標準未到,本身大大隻字話係唯一現場睇歐聯的倫敦球場,要點先實現?16強過到多蒙特先成事。
本來今季溫布萊主場威力十足,殊不知被狼隊反勝,最近更被迪基亞擊敗,為爭標之路蒙上陰影。
人腳上,孫興愍需要為國效力參與亞洲盃,此時卻傳來惡耗:
哈利簡尼因為韌帶受傷,需要休戰到3月先可以復出恢復訓練。
其實除了曼城、車路士,熱刺同樣係四條戰線上努力,
不如先一齊睇睇阿Claim去到3月頭佢會錯過咩賽事:

聯賽:
客對富咸、主對屈福特、主對紐卡素、主對李斯特城、客對般尼、客對車路士、主對阿仙奴。
難捱指數:★★★
七場波,四隊係頭十位,其中除了對車路士外,三場都係主場,都算係不幸中大幸。
亞洲盃去到2月1日,孫興愍無病無痛就可以及時歸隊。

盃賽:
難捱指數:★★★★★
聯賽盃次回合對車路士,如果順利維持首回合領先優勢晉級,2月25號將會上演決賽,
到時對手,肯肯定係曼城,無咗簡尼,慘。
至於歐聯16強對多蒙特,首回合主場就肯定無份,至於次回合...都唔多樂觀。
所以足總盃對水晶宮,可能將會變成熱刺一個舉足輕重的盃賽了...

有留意開足字室,就知道筆者此刻的心情其實係涼涼地,
不過,既然普捷天奴咁頭痕,點都同室友一齊幫下你度掂佢啦。
多謝室友COYG意見,筆者再整合咗少少:
第一式:唔放人走唔賣人
無簡尼、無孫興愍,施素高又傷埋,倒不如將阿里推前,畢竟翼位上仲可以出盧卡斯或拉美拿,
同時唔賣丹比利,一個本來會去中超的31歲老臣子,雖然合約得番半季,但係水深火熱之下,你仲唔搵佢放中場?
第二式:轉陣雙翼變雙箭
阿里打前一格打前鋒,連同洛蘭迪一齊打前,係咪一個出路?有室友話可以用贊臣
但佢今季早早被普帥投閒置散,早幾日表明不在自己計劃之中,一個季初係連號碼都無的球員,會唔會成為及時雨?
上官網睇,贊臣連號碼都無,喊出嚟。

大家又不如幫手留言度掂佢?

除了訂閱我們的專欄,
仲可以在Facebook Like我們的專頁 — 足字室

loading


標籤: 熱刺  哈利簡尼  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→