【陋室雜談:阿迷可以怪奧斯爾嗎?可以。但我揀咗..】

足字室 於 30/05/2019 發表 收藏文章
文:蘭斯貝利

今次篇文無圖,因為唔想阿迷見相就諗起場波,請見諒。

其實,當一隊波踢得唔好,甚至一場重要決賽輸咗,係忠實球迷的話,要罵要批評無問題,筆者相信愛之深,責之切,
只要唔涉及人身攻擊屋企人的話,不吐不快發洩是理解的。

而場波完咗我選擇咗忍住對奧斯爾的無盡不滿,畢竟佢換走又慢慢行,高薪又無貨交,批評佢實在太容易,你叫筆者即刻寫一篇幾百字叫奧斯爾退出阿仙奴的文呃Like,其實一定做得到,但咁樣,同世界盃時見到有人覺得奧斯爾係原罪無分別,咁筆者解讀下阿迷覺得佢會係罪魁禍首的原因啦。簡單講:

因為期望啊。
期望佢挺身而出,期望佢在球隊落後時可以領導大家。咁多年,機會俾咗,時間俾埋,揀埋佢都無揀藍斯,佢做唔到,球迷失望,所以佢亦需要接受呢種評價,只要,


講的係真心愛阿仙奴的球迷。


同樣道理,我對蘭尼斯的災難表現,唔會太過份苛責。作為一個年青替工,佢盡晒力。
今季後防的令人失望,賀定及比歷連的收咧,不多不少有關係。
當我地看到前場雙子默契十足,其實也要明白後防都需要時間去建立,所以我真心欣賞利奴。

等同細爆即使再甩轆,比起細梅,算得什麼?
你係新仔,職場都會俾機會你,中層高層出事?死得啦。


時間,係現今社會人人最需要,但最唔夠的嘢。廿年阿迷,已經佔據我現時三分二人生的時間,其中有十九年係雲爺爺,一年係愛Sir。
艾美利都有好多地方都值得去批評,有機會遲下講,

但我唯一最唔滿意令我要罵,係佢換代太急,走晒韋舒亞藍斯,令到某種文化無咗,去阿仙奴化操之過急,都係令佢失去一定球迷質疑的原因。

至於其他嘢,以一年來講,我收貨。

如果你問我,在季初兩連敗後,有人話你聽你尋晚仲可以在歐霸決賽為阿仙奴打氣,
我相信聽完你都覺得磁能線。


所以呢個係我唔怪愛Sir 的原因,佢中前場都執得好好,當然我所講的好,係基於接手廿年體系後的改變。托拉拿的淚水證明佢係值得阿迷愛戴,而前線下季相信可以更進一步,如果唔離隊。

當然,筆者討厭站在道德高地的人,我都有好憎好憎的對象。最後,如果你要我揀一個人罵,我會用盡畢生所認識的粗鄙字眼去同一個人講

「高安基,躝啦。」 (字體其實仲想再大啲。)

後記:其實多得室友支持,筆者先敢寫多啲感受,謝謝大家。希望阿迷放工後好好休息,星期六歐聯決賽夜一齊撐利物浦,不作他選啦係咪?黃子華的魚蛋論,係時候啦。

無論撐邊隊的球迷想分享、想用文字記得自己對球隊的點滴,歡迎嚟足字室!如喜歡我地的文章,請Follow我地的專欄,亦都可以關注我地Facebook Page,球壇最新動態盡在此!

loading



標籤: 英超  歐霸  阿仙奴  車路士  奧斯爾  原罪  

留言


請按此登錄後留言。未成為會員? 立即註冊
    快捷鍵:←
    快捷鍵:→