【陋室雜談:一念天堂地獄 利熱二十七號】

足字室 於 02/06/2019 發表 收藏文章
文:蘭斯貝利

昨日歐聯決賽曲終人散,利物浦兩球完勝熱刺,比聯賽表現更好,無失波俾對手。
再次恭喜利物浦,經過管理層多年努力,加上信任高普,終於繼2005年後再度奪得歐聯,亦繼2012年聯賽盃有冠軍落袋,以今季整體表現,絕對是努力的回報。


而熱刺繼續與冠軍無緣,成為英超頭六名中錦標荒最耐嘅一隊,十一年來未嘗捧盃。


讚利物浦,抽熱刺水呢啲尋日已經夠晒,再講落去都無意思,
瞓醒回顧場波,睇番今場結果係咁,有人話十二碼係轉捩點,但一個兩分鐘的入球就已經係成場波轉捩點又真係太武斷,我就覺得勝負分野在於高普同普捷天奴兩位排陣同調動的一念之間。

你可以話,施素高一」指」錯,但令到成場盤棋最後無力挽回,普捷天奴責無旁貸。
一開始睇正選出場陣容,見到利物浦出法明奴,熱刺出哈利簡尼,滿心期待兩隊都係強陣出擊,特別係傷癒復出的兩位。
點知成個上半場,兩位球員的演出,都不似預期。筆者與朋友睇波睇到20分鐘,已經發現上述兩位真係消失咗球場,變咗同大家一齊做觀眾睇波咁。或許是狀態未復,其實都情有可原,操唔起,無計。
但當一位球員未能發揮表現,主帥理應盡快調動,何況係落後嘅熱刺?
其實,高普同普捷天奴後備席上各自有27號機待命。

唔好睇少呢兩架27號機,利物浦奧歷治真心係福將,而佢唔係吉祥物咁簡單,四強次回合,法明奴沙拿唔出得,但佢上陣後,梅開二度,仲第二球把握阿諾福至心靈的角球攻勢射入巴塞大門,將利物浦由被睇死的一方變成反勝晉級的一方,利迷已經錫晒佢。
而熱刺的摩拉,佢任務更為艱鉅,但補時絕殺,以帽子戲法擊敗阿積士入決賽,已經值得給予掌聲。
相信呢兩個人打正選,無球迷會質疑,相反係配得在十一人中出現。


可惜,兩個幫球隊入決賽嘅27號仔,都係次選。

法明奴替代奧歷治理解,但最令筆者摸不著頭腦嘅係,你用簡尼,唔換簡尼都無咩問題,搏佢有態呢啲大家都明,但你揀經驗一般的契仔榮斯打正選,咁就真係有問題,榮斯?掛住睇女咋。

不過,下半場高普見唔對路。作為領先一方的利物浦率先調動,換入奧歷治,果斷。然而普捷天奴卻在對面換多個占士米拿後,先換入摩拉,果陣係66分鐘,遲晒。
而最諷刺的係摩拉一入嚟,本身沉悶的比賽注入生氣,變得好好睇,熱刺攻勢入肉好多。作為阿迷嘅我,都替利物浦擔心。

不過,今次的英雄,都係27號,一球死角入球真正殺死球賽笑到最後,
利迷都應該立個銅像俾你啦。
而賽後另一個27號仔哭成淚人。

其實點解搞到咁?
老細用人唯親唔重用你,悲涼。
俾著你盡心為公司,業績跑爆數,傾生意交到貨,點知老細用個久休復出未有態的同事去傾份全年最緊要嘅合約,明明份約自己跟咗一段日子,最後搞唔掂搵番你補鑊,冇時間點幫?
俾著你,感覺似係用完即棄的膠袋,得到有事鍾無艷的對待,你唔灰?
摩拉唔好喊,你盡晒力。

普捷天奴,今次功虧一簣,你唔好怪球員。
殺死場波嘅,唔係球證唔係果下十二碼,係你啊。



無論撐邊隊的球迷想分享、想用文字記得自己對球隊的點滴,歡迎嚟足字室!如喜歡我地的文章,請Follow我地的專欄,亦都可以關注我地Facebook Page,球壇最新動態盡在此!


如果喜歡我們的文章,請即分享到︰

標籤: 英超  歐聯  利物浦  熱刺  

留言

會員
我要評論
請按此登錄後留言。未成為會員? 立即註冊
  • Watson Kwan
    Watson Kwan 於 03/06/2019 評論 NO. 1

    正字係「一子錯」

  • 風隨行
    風隨行 於 03/06/2019 評論 NO. 2

    因為我想表達佢隻手指錯HAHA

快捷鍵:←
快捷鍵:→