紅魔鬼賽後評 歐霸 柏辛域多尼亞 1-2 曼聯 (12-12-2024) 精選

1. 上半場空有控球，但有威脅既射門並唔多，踢咗三十幾分鐘兩面連一次中龍既射門都冇，有一下反擊Amad帶波，明明中間般奴冇人mark，佢偏要傳比左面窄位既福仔，福仔不負主隊球迷眾望一腳射咗上看台。
2. Amad呢場既發揮明顯係近來高水平發揮既水準之下，好多次做決定時，無論係比波、扭波定射波都做錯決定，不過追平果球要讚下佢有啲位做得唔錯，佢接應同扭入去禁區入面都做得好好，但就射得太正比龍門救到，好彩比賀隆執隻靚雞，都算有功勞。

3. 正選陣容出咗舒克斯同福仔，我覺得係為咗輪換加拿祖同賀隆，尤其是後者，雖然阿莫林讚過佢作為中鋒既能力同表現，但同時都有暗指佢體能唔好，話佢到比賽尾段時就快跑唔郁。

4. 可惜呢舒克斯同福仔完全唔爭氣，真係進攻黑洞，所有波去到佢哋度基本上全部終結咗，舒克斯好似上腳太多，係有一下扭入禁區好靚，但其餘時間好多時都比人夾甩個波，又或者自己傳失咗，福仔仲衰，鳩射、鳩傳、鳩走，總之係鳩。福仔再唔自己爭氣，冇人幫到佢。
5. 般奴雖然第二球個助攻幾有心思，但其實全場啲決定都做得好急，有一下明明Amad右面空晒有靚位，佢都要自己射。

6. 射唔係唔好(如果射得入既話)，但明明有隊友喺個更好既位，仲要係空撚晒佢都照射，最慘係唔算太有角度，龍門正常都要救得到。

7. 好喇，要講今晚最鳩既球員，對唔住，可能真係Onana(或者加埋10同11排名不分先後？)。我係有果句講果句，之前佢踢得好既時候我係有讚佢，而確實，今季大部份比賽冇咗佢既話可能係會由贏變和，由和變輸。但係呢兩場真係好大鑊，繼上場重大失誤三連發之後黎個第四連發，4個失誤導致失咗3球。

8. 我最擔心既事似乎真係出現咗，就係今季本來發揮神勇既Onana似乎受到上場失誤影響信心，對森林失咗第二球之後，表現好似患得患失，以呢個狀態去作客曼城，絕對唔係乜嘢好事。
9. 追返一比一之前個勢仲要去晒主隊度，你都咪話唔驚。話時話，我都係上網咁啱睇到，原來對上一次喺歐洲賽有人贏柏辛域多尼亞係2022年既巴塞。呢個時候我都打定輸數，以曼聯最近既表現，要反勝真係難啊。

10. 好彩呢個時候後備入替福仔既賀隆挺身而出，一球執雞一球half chance兩球都成功轉化成入球，最後為球隊反勝二比一，佢不愧係而家曼聯陣中極少數把握力合格既球員。

11. 不過把握力仲係重要課題，Mason Mount錯失兩球黃金機會，兩球都係單對單射比龍門，佢入黎之後係好生猛下，但如果咁樣呢兩下黃金機會一球都入唔到又真係要比人鬧下。

12. 安東尼後備出場我覺得都唔錯喎，當然對手唔勁，但係助攻助守都做到嘢，追平果球佢傳比前插既Amad傳得好靚。
13. 成場黎講打得真係唔算好，不過全取三分係件好事黎，都係果句，要時間去適應新陣式、新戰術、新教練，比啲時間阿莫林。


#不專業足球筆記 #足球專欄 #專欄 #我愛紅魔鬼 #曼聯每日情報站
#歐霸 #紅魔鬼賽後評 #MUNNFO #曼聯 #柏辛域多尼亞 #賽後評

更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio


廣告時間 -

ig: leafopen3
instagram.com/leafopen3fb: leafopenleafopen
facebook.com/leafopenleafopen
方格子︰ https://vocus.cc/salon/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938