紅魔日報 仲要多兩個月！馬拉西亞預計10月先復出 DO︰拜仁拒絕曼聯對迪列特、馬斯奧爾打包報價 2-8-2024

紅魔日報 仲要多兩個月！馬拉西亞預計10月先復出 DO︰拜仁拒絕曼聯對迪列特、馬斯奧爾打包報價 2-8-2024
想收睇或收聽影片版：
1. 雖然轉會大神Fabrizio Romano講過曼聯今個轉會窗依然會瞄準左閘，但一直只聞樓梯響，唔知係咪同佢哋認為梳爾同埋馬拉西亞即將復出有關。

2. 不過坦克佢確認，馬拉西亞最快都仲要兩個月先可以復出。今次似乎唔係啲乜嘢傷完又傷，而係佢本身個進程真係要多兩個月，所以就話最快都要十月先可以復出。坦克其實距離復出都唔遠…咁又係，佢唔傷都傷咗年幾，都係等多兩個月啫…
3. 最驚係曼聯班垃圾黃綠醫生又估錯咗啫，上季佢哋預馬拉仔1月可以復出，所以坦克決定將列古朗送走，點知黎緊最新情況，係要去到今年十月…

4. 據聞曼聯睇中拜仁右閘馬斯奧爾既其中一個原因，就係覺得佢可以客串左閘，咁就可以慳返一筆唔買左閘位，但如果雲比沙卡一走，梳爾大吉利是又傷過，咁基本上同上季下半季一模一樣，兩隻可以客串左閘既右閘踢晒所有比賽，你都咪話唔痴線…

5. 呢個情況，希望17歲新仔阿馬斯爭氣，可以留響一隊兼企穩陣腳喇。

6. 講下新鮮熱辣由另一名轉會大神David Ornstein既消息，曼聯向拜仁慕尼黑提出咗報價想打包簽迪列特同埋馬斯奧爾，不過拜仁就拒絕咗，佢哋想賺多啲，而談判仍然進行緊，個人條款就唔係問題，擺響枱面既係5年+1年既合約。
7. 迪列特同馬斯奧爾既陣營其實有啲不滿，因為拜仁方面已經同咗佢哋講，佢哋唔喺球會既計劃之中，而願意配合佢哋尋找新球會，但而家就諸多留難。

8. 拜仁咁強硬都無何厚非，曼聯出名係水魚黎架嘛，唔鋸你鋸邊個？唯有希望新管理層做到嘢，唔好比人劏喇。

9. 跟住係一單暫時聽咗就算既轉會，據Manchester Evening News表示，摩連奴既費倫巴治想買安拉拔。MEN不嬲都吹水多，佢引既source都係啲膠source，所以響有其他消息來源之前，都係聽住先算嘞。

10. 之前大神Fabrizio Romano都講過，曼聯唔係唔想買安拉拔，只係想用再平啲既價錢去買啫，上年安拉拔最尾既表現都唔差，如果最真係可以返去曼聯就好嘞。
#不專業足球筆記 #足球專欄 #我愛紅魔鬼 #紅魔日報 #曼聯 #ManchesterUnited #FabrizioRomano #DavidOrnstein #TyrellMalacia #馬拉西亞
#拜仁慕尼黑 #BayernMunich #MatthijsdeLigt #迪列特 #NoussairMazraoui #馬斯奧爾


曼聯Youtube Channel︰ https://www.youtube.com/@manutddailyinfo
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938