有興趣睇影片版既可以睇呢度︰
https://youtu.be/gXE1d81QOVg
紅魔日報 友賽慘勝 曼聯再傷兩件！ 富咸2000萬鎊求購麥湯文尼 1-8-2024
1. 今朝曼聯同皇家貝迪斯踢咗表演賽，結果曼聯就以3比2勝出。不過講呢場波之前，我想update返少少球隊既傷兵情況先。
2. 尋晚我臨瞓之前先睇到Fabrizio Romano話約羅蹠骨骨折，其實都大鑊，但當時佢既第一個po係未有提到賀龍既情況，當時都仲以為網絡上既消息可信，賀龍應該冇乜嘢，只係輕傷，被換出都係因為預防性換人，應該抖幾日就冇問題。
3. 點知仆你個街…一起身好多個唔同媒體既page、ig都彈晒出黎，話曼聯官方確認，約羅蹠骨折斷要抖三個月，而賀龍就因為腿筋拉傷，要抖六個星期…果然，之前啲所謂可信既外國曼聯KOL，全部都係鳩UP…
4. 中堅我哋都叫做人數夠既，不過真係接近世界級既始終只係得馬天尼斯一個。我唔肯定曼聯本身對約羅既定位係點，但究竟約羅重傷三個月會唔會加快佢哋求購其他中堅既速度，我覺得都幾有可能。
5. 不過，Manchester Evening News有篇嘢都幾過癮，佢哋話曼聯響賀龍傷咗之後就會考慮求購艾雲東尼呢名英格蘭國腳，儘管之前佢哋已經冇考慮呢個轉會。
6. 我諗除非賓福特大劈價喇，如果唔係冇乜可能架喇。之前賓福特吹到要成一億鎊架嘛，就算真係好似最近既傳聞咁降到3至4千萬鎊，曼聯都未必會比呢筆錢。賀龍傷咗啫，唔係死咗吖嘛。
7. 而且曼聯唔係冇鋒用，佢哋都仲有新簽返黎既荷蘭國腳舒克斯，雖然真係未知佢咩料，但佢上年響博洛尼亞上陣37場入咗12球，幫博洛尼亞拎到第5，應該都幾唔錯既。驚係驚意甲既球星轉會去英超呢個打法完全唔同既世界，佢會唔會水土不服啫。
8. 講返場友賽，今場正選上陣既一隊成員眾多，基本上只係剩返左閘阿馬斯呢個17歲既小朋友唔係一隊。
9. 幾時都話，呢啲表演賽睇戰果冇意思，睇下球場上球員既表現先係最有用。
10. 用呢個角度去睇，Amad戴亞路可以話基本上會響開季既時候坐穩右翼既一個正選位，佢一個入球一個助攻，表現極為出色。
11. 另外左閘既阿馬斯真係越踢越好。第一場對洛辛堡果陣，我仲覺得佢真係吹大咗，但係經過上場對阿仙奴，我已經對佢改觀唔少，係防守真係受身型所限同經驗所限，做得麻麻。而今場對住貝迪斯，真係做得好好，下半場隊友換咗之後，表現有所回落，但考慮到佢係個後生仔要人帶，呢個真係唔太問題。
12. 梳爾既傷患紀錄太過恐怖，馬拉西亞又好似中咗降頭咁到而都未復出，阿馬斯真係值得留低。
13. 另外辛祖今場既表現都sharp醒過之前，佢之前略嫌佢傳波保守，又唔敢突破，但呢場唔知係咪因為對手唔算太強，佢終於放多咗膽去做，效果都唔錯，雖然同多蒙特果個辛祖仲差得遠，但都係一個好開始黎。
14. 暫時成個熱身賽期咁多場波最令人失望我覺得係漢尼拔，呢位昔日青訓天才真係越踢越沉，乏善足陳，有價既話真係好賣喇…
15. 不過，最慘既係，呢場波又傷兩件，華舒福同安東尼離都疑似受傷離場，真係夠晒痴線，唔知係打波定係打仗…暫時冇任何關於佢哋既傷情最新消息，希望唔好有啲乜嘢大傷…
16. 跟住講單轉會消息，根據轉會大神Fabrizio Romano表示富咸已經向曼聯提交咗一份超過 2,000 萬鎊既報價求購麥湯文尼，不過預計將會被曼聯拒絕。不過曼聯係願意以接近 3,000 萬鎊賣既。
17. 早前已經有消息話曼聯都視麥湯係個重要球員，但又唔係非賣品，價錢好到位既都會賣。我覺得都啱吖，上季正選未必場場踢得好，但後備出黎救咗曼聯好多次，唔係真係價錢吸引，真係死都唔好賣。
18. 最後就係曼聯助教麥卡倫將會離開曼聯，成為牙買加國家隊教練，祝佢一路順風！
#不專業足球筆記 #足球專欄 #我愛紅魔鬼 #紅魔日報 #曼聯 #ManchesterUnited #FabrizioRomano #季前熱身賽 #貝迪斯 #RealBetis
#約羅 #LenyYoro #富咸 #Fulham #ScottMcTominay
曼聯Youtube Channel︰ https://www.youtube.com/@manutddailyinfo
更多專欄內容︰ https://www.leafopenleafopen.com/unprofessional9up更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938
請按此登錄後留言。未成為會員? 立即註冊