不專業足球週記 (四)

不專業講足球 於 13/01/2022 發表 收藏文章

本地波就因為疫情所以暫時收左檔所以冇比賽,不過都仲有啲場邊新聞既。

大家仲記唔記得艾華?呢位2015黎香港效力南華既喀麥隆快翼,原來已經居港七年,期間仲響香港結婚生仔,佢而家就申請緊特區護照做真香港人,又期望有朝一日可以重返港超聯,甚至披上港隊既戰衣。

不過,其實佢只係速度真係超晒班,射術同技術都好一般。值得一提,我記憶中佢當年響南華都有唔少頭鎚入波,但整體而言,以外援黎講,佢算係快比人睇穿條路。

我相信艾華真係可以當本地球員既話係可以吸引到港超球會招手,但要入選港隊始終都係要睇自己既表現。

仲有另一個熱門話題就係港腳梁諾恆所在既浙江隊響升班附加賽兩回合計贏左中超既青島隊,同另一港將勞烈斯效力既梅州客家一齊成功衝上中超。

講起中國,有「猶戴」之稱既戴偉浚成功拎左中國護照……屌,唔撚想講佢。

意甲今個星期最好睇既就係羅馬對祖雲達斯既大戰,兩隊合共炮制左7個入波,羅馬曾經領先到三比一,但又比祖記連入三球反超前,之後祖記又有迪列治禁區入面手球兼紅牌。以為羅馬追得平?祖記又有施捷斯尼救出柏歷堅尼既補射,保住勝局。

唔講唔知,原來阿巴咸暫時係五大聯賽入面入得最多波既英格蘭球員,不過佢幾威都好,都救唔到摩連奴手下既羅馬。羅馬歇冬後已經先後輸左比祖記同AC米蘭排第七,同第六位既費倫天拿同分但打多兩場,歐聯席位真係凍過水。摩連奴似乎又再一次證明,而家既佢已經由special one變左normal one。

英格蘭足總盃不嬲都係爆冷既溫床,阿仙奴就率先陣亡,輸比諾定咸森林一球。有查比亞加盟既紐卡素,同樣一球不敵甲組仔劍橋聯。曼聯既表現依舊垃圾,慈善球王福仔顧住埋怨隊友連雞都唔執既場上態度令人側目,曼聯既前景令人非常擔憂……

下次再傾!

btw有興趣既可以follow下我:

ig: leafopen3
instagram.com/leafopen3

fb: leafopenleafopen
facebook.com/leafopenleafopen

個人網站: leafopenleafopen.com

留言


請按此登錄後留言。未成為會員? 立即註冊
    快捷鍵:←
    快捷鍵:→