紅魔日報 烏加特瘋狂推動轉會 PSG仍企硬唔降價？ 貝治加盟富咸 麥湯留隊定轉戰意甲？ 19-8-2024 精選

紅魔日報 烏加特瘋狂推動轉會 PSG仍企硬唔降價？ 貝治加盟富咸 麥湯留隊定轉戰意甲？ 19-8-2024
1. 英超第一輪比賽完結，big 7入面除咗車路士同熱刺之外，全部都全取三分。車路士就冇得好講喇，對住曼城，即係兩隊big 7點都會有一隊失分架嘞，咁對住曼城喎，就算今個轉會窗暫時冇乜買人，畢竟都係上季冠軍，夾慣夾熟，輸係正常。

2. 話時話，其實Big 7係我自己定義架咋，係一般傳統上又或者新興有啲錢既強隊。曼聯、曼城當然有份，阿仙奴、熱刺、車路士、紐卡素同埋利物浦都係其中，其實我本來想加埋維拉落去，佢哋上季好癲，但佢哋又唔係突然有油王入主大手買人，或者連續幾季都有前四，我暫時持觀望態度，不過我覺得佢哋好有potential，事實上佢哋今季第一場比賽作客韋斯咸已經可以全取三分，睇黎今季都唔嘢少。
3. 曼聯暫時因為得失球排響第七，下場就要作客暫時榜首既白禮頓，到時真係惡戰囉。

4. 不過扯得太遠，到時如果有時間我應該會做個preview，今日呢集講返呢幾日新聞先。

5. 主要都係一啲轉會消息喇，根據Fabrizio Romano既講法，曼聯好希望響轉會窗完結之前簽多至少一個球員，個人認為最有機會係巴黎聖日耳門既防中烏加特，其實烏加特都好明顯唔響PSG既未來計劃入面，不過PSG對個價錢企得都幾硬，而曼聯除非賣到人，又或者PSG肯減價，如果唔係真係買唔起。

6. 不過大神都講過有個利好因素，就係烏加特好想加盟曼聯，佢直頭「PUSHING like CRAZY」去轉會曼聯，唔知咁樣會唔會都比到啲壓力PSG嘞。大神最新消息就話，曼聯可能會向PSG先借入烏加特，入面含有買斷條款，又睇下呢一兩個星期最後會發展成點嘞。
7. 之前就話如果曼聯買唔到烏加特，咁就會考慮英冠般尼既貝治，不過大神啱啱已經here we go咗貝治既目的地係富咸，咁睇黎轉會窗得返兩個星期，曼聯應該會全力追逐烏加特嘞。不過新管理層會唔會好似阿諾同木狗咁一擲千金？我就有所保留，所以到最後真係乜防中都買唔到都冇計。

8. 大神早一兩日仲話富咸好想要麥湯，但而家用差唔多既價錢買咗貝治，仲會唔會買麥湯呢？我同樣都係好有保留。

9. 而家UP得出名又對麥湯文尼有興趣既，似乎得返拿玻里，但拿玻里賣唔走奧士文，佢哋又一樣冇錢買麥湯。

10. 不過麥湯態度好，後備出黎係可以做得到奇兵作用，留隊雖然令球會響FFP上冇咁充裕，但都未必係一件壞事黎既。
11. 另外，仲有希臘勁旅彭拿典奈高斯想要收購柏列斯治，根據大神所講，呢單deal好快就會有進展！

12. 而另一名年輕中場漢尼拔都已經遞交咗轉會申請，據聞格拉斯哥流浪處於領先既地位！

13. 今季轉會馬賽既格連活特第一次會馬賽踢法甲就入咗兩球 ，協助隊以5:1 大勝上屆聯賽「三哥」比斯特。

14. 關於呢個球員，唉，真係可惜。始終英國係左膠地方，啲人都痴撚線，連一個改過自新既機會都唔比人。

15. 點都好，希望佢仍然有機會返曼聯踢喇，佢真係我見過最有埋門天份既後生仔，好有潛質！

16. 最後喇，「一代宗師」菲爾鍾斯宣佈退役。其實上年佢轉做教練時都預咗，而家叫正式宣佈啫。一代宗師，祝你執教生涯順風順水！
#不專業足球筆記 #足球專欄 #我愛紅魔鬼 #紅魔日報 #曼聯 #ManchesterUnited #英超


曼聯Youtube Channel︰ https://www.youtube.com/@manutddailyinfo
更多專欄內容︰ https://www.leafopenleafopen.com/unprofessional9up
更多小說內容︰ https://www.penana.com/user/52938/%E8%91%89%E9%96%8B%E8%91%89%E9%96%8B/portfolio
如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938