港隊賽後評 省港盃次回合 香港 1-2 廣東 (22-1-2025) 精選

港隊賽後評

省港盃次回合 香港 1-2 廣東 (22-1-2025)
1. 先講結論，如果睇返呢球香港B隊既球員資歷，全隊得6個球員唔係23歲以下，仲要有幾個係喺外國讀大學冇踢職業波，對住中超深圳新鵬城做骨幹既廣東踢到有來有往，其實我會比合格。

2. 不過，亦都因為呢隊香港隊既球員太後生，經驗明顯不足，亦唔夠硬朗，都係今場輸波既其中一個原因。

3. 講講球證，佢吹罰都算冇乜大問題，佢既問題係比牌準則，廣東踢到打摔角咁，雖然吹罰就大部份時候都有吹既，但係我覺得要比牌果啲佢就算好鬆手下，有球後備入替既劉智樂比人扯到件衫爆咁滯都唔吹。而對面個中國國腳27號百合拉木入完波除衫比牌正常，但挑釁球迷之後引起衝突果下可以比多張牌。佢又除衫又做挑釁手勢，屌你老味好彩呢度係香港，啲球迷算係斯文，唔係真係衝入場打撚死你個仆街冚家剷。另外，7號李寧身有一張黃牌，當住球證面發脾氣踢走個波又淨係口頭警告。我唔知點解佢比牌好似有啲顧忌咁，可能驚犯國安？佢比牌尺度正常啲個百合拉木一早出咗場，唔駛去到完場之前一分鐘先因為阻住港隊開界外球領第二張黃牌。屌你老母，犯咁多次規臨完場先紅佢，不如唔好撚紅？
4. 上集講過，廣東主場往往有主場雞，香港就相反既，講緊既就係呢啲。

5. 正如文章開首所講，睇球隊表現，港隊係合格有餘既，我見有好多page既留言，對球隊表現好失望等等，其實我唔係太認同，尤其是當你睇返球員名單既時候更加覺得係咁。

6. 上半場，廣東隊憑住硬淨既打法，取得唔少甜頭，但除咗球入波之外，就只係得一開波冇耐既角球連環中楣係有啲威脅。

7. 相反，港隊有威脅既攻門真係唔少，史堤芬彭利拿中距離射門、劉家喬空門射出界、艾華亂軍中射門被護空門、臨完場門前掠過空門港隊球員黎遲半秒等等，場面形勢黎講唔係好有甜頭，但論攻勢威脅度就真係港隊有威脅好多。
8. 下半場出返黎之後，一開波冇幾耐就由劉家喬個人表演，一個抽四個扭入禁區射近柱入網，為港隊追成平手。

9. 之後我覺得港隊開始適應咗廣東既硬淨踢法，五五波冇乜點縮，不過普遍黎講港隊球員真係細粒過廣東，除此之外，後備力量都有分別，當球隊換完人之後，我覺得好似開始越踢越差咁。最明顯係劉智樂同劉家喬既分別，我好欣賞呢位流浪隊長，但係佢入黎之後，好似同隊波完全唔夾咁，甚至有啲面對面交失波既情況。

10. 輸第二球波，首先防守時唔見咗左閘曾樂圖，其次係馬希偉防守既時候比咗太多空間個27號睇定黎斬，遠柱既阿歷斯祖jojo其實已經盡晒力成個身壓落個9號度，但講堅個9號拗腰係頂得靚，就係臨完場先輸第二球，真係好傷。
11. 不過可喜既係，處於劣勢既港隊冇放棄，反而喺補時搶返唔少攻勢，如果唔係曾以行臨完場近門撻Q，應該係可以追返二比二。但呢球冇得怪佢，踢足九十分鐘，上上落落，中堅殺埋入禁區，用非慣用腳射，只能講一句好可惜。

12. 特別想提下Jojo，盛傳有中超球隊想簽佢，第一回合尚可，但今場好多控球在腳時佢唔知點知，係咁自轉，面對面大力ban個地波拎死人，佢今日進攻方面尤其地顯眼地有不足。如果佢真係成功外流，希望佢真係可以有進步。仲有肥彭，今場下半場中段開始好明顯體力不繼，其實可以試下換走佢，但教練又有啲驚冇咗個主力唔敢換。

13. 輸係輸咗，但呢班後生仔對住中超球隊都冇怯場，踢到有來有往，其實幾驚喜。如果唔係上場果球誤判十二碼，鹿死誰手冇人知。
14. 不過另一個角度睇，就係唔怪之得深圳新鵬城上年要踢到最尾先至護級成功，對住呢隊有幾個仲讀緊大學冇踢職業波既，都踢得咁辛苦，真係中甲料黎咋喎。


#不專業足球筆記 #足球專欄 #專欄 #我愛本地波 #省港盃
#香港 #香港隊 #廣東 #wearehongkong #足球 #賽後評
#香港隊勁揪 #香港加油

個人網頁︰ https://www.leafopenleafopen.com

廣告時間 -

ig: leafopen3
instagram.com/leafopen3
fb: leafopenleafopen
facebook.com/leafopenleafopen

如果有興趣睇下我既其他寫作作品，可以上 leafopenleafopen.com 或者 https://www.penana.com/user/52938/%E8%91%89%E9%96%8B%E8%91%89%E9%96%8B

如果覺得我寫嘢OK想請我飲杯咖啡支持下我既，可以上 https://www.penana.com/membership_plan?id=52938 或者 https://m.penana.com/stream?id=52938