不專業足球週記 (一)

其實想輕輕鬆鬆咁每個星期寫啲隨心小小既足球文好耐，所以而家先會落筆寫呢篇十九文。
既然隨心寫，就即係亂寫一通，不過我就想寫多小小本地波既野，可能再加啲歐洲波咁。

聖誕檔期講起本地波，就一定係睇足總盃。東方龍獅就憑住大佬梁冠聰既入波一箭定江山，率先氣走理文入決賽。不過都可惜，因為理文既一對箭頭杜查祖利亞同基華尼頓都缺陣，等於讓東方龍獅半臂。不過講堅自從南華降左班之後都冇乜特別鍾意邊隊，但理文響亞協盃果種拼搏精神真係好激動人心，加上有我最鍾意既徐宏傑在陣，所以理文出局我都覺得幾可惜。

至於另一場四強大戰，原本預期係一場七三波，但係傑志踢足87分鐘先至由後備上陣既查理史葛射個割草式地波，同樣都係以一球擊敗標準流浪入決賽。不過焦點當然係基藍馬吐口水一早領紅返更衣室休息喇，只係面對全軍退守兼且防線發揮出色下，攻勢都有啲老鼠拉龜，最後贏波可以話係意料之內又啲驚險。
足總盃決賽既戲碼，又係近年既兩位老對手傑志對東方。而兩隊近季既交手往績，呢場決賽傑志都係睇高半線。

黎到聖誕，梗係離唔開英超快車喇。最好睇既梗係曼城果場，領先四球之下響55至65分鐘內比李斯特城連追三球，但最後有驚無險再入兩球，以六比三結束呢場入球show。至於曼迷就冇聖誕快車睇喇，想睇曼聯就要等到28號喇，因為之前曼聯太多球員中左武肺，所以就延左唔少比賽。

之前吹到好勁既卡雲尼轉會巴塞，似乎隨住費蘭托尼斯即將加盟巴塞而告一段落，曼迷可以鬆一口氣。希望佢傷愈之後可以有更加多出場既時間喇。

講起巴塞，迪比利好似會唔聽經理人話，接近U Turn降薪續約兩年。而家啲經理人美其名係幫球員，但其實只係幫自己搵著數。之前國際足協話會有新規則限制佢地，希望唔好得個講字。
講住咁多先，下次再傾！

btw有興趣既可以follow下我:

ig: leafopen3
instagram.com/leafopen3

fb: leafopenleafopen
facebook.com/leafopenleafopen

個人網站: leafopenleafopen.com