【感動突發】 比卡超加盟阿仙奴!

球場二三事 於 22/07/2016 發表 收藏文章
出黎咧,阿仙奴比卡超!同我用「閃光彈」!!!!

阿仙奴比卡超的女主人:

阿仙奴同比卡超,係兩個世界嘅事物,大纜都扯唔埋。你卻發揮小宇宙,將佢地二合為一。一齊左731天,我永遠都記得佢!

你知我鍾意比卡超,你知我當阿仙奴係二奶,上年情人節你專登將呢兩樣野合體,整左隻阿仙奴比卡超出黎,我夠膽講佢係我心目中阿仙奴史上最強最可愛嘅球員XD。上年情人節收到,其實果下好感動,可惜你個傻豬忍唔住事前俾我睇左一次,如果唔係應該仲surprised。今日拎番出黎睇,呢個酋長球場真係百看不厭,仲要加埋我都好鍾意嘅噴火龍BB,無得輸。金錢物質堆砌嘅世界,手作與心思更顯矜貴。女朋友肯為自己整阿仙奴嘅禮物,應該難過當年阿仙奴不敗拎英超。我覺得我地有日要拎番晒送過俾對方嘅禮物出黎,一齊再回憶sweet下。

Pokemon Go 幾時有得玩啊???我同你都down左個apps,你成日講話想同男朋友打機,但係我都冇反應。今次飛雲來了,我地幾時可以一齊出去捉小精靈啊?呢隻阿仙奴比卡超我捉硬架咧,冇人可以同我爭!!!
其實我開左個專頁同埋係Fanpiece寫文已經有兩個月,小毒毒自己投稿出post,一路都冇同身邊識嘅人講,因為我希望第一個知嘅係你。我想話你知我做緊一件一路以黎都好想做嘅事,就係同人分享足球嘅點滴同背後嘅故事。嗱,你成日話我咩都唔同你講,今次你係第一個人知我係網上做緊呢壇野,唔好嬲我啊! 我唔知自己可以做得有幾大同幾遠,不過我希望你可以支持我。就算有日啲文同啲post摺到冇人理,你都係會繼續俾「讚」撐我。

3年前,當時同個朋友去左阿仙奴嘅酋長球場朝聖同睇英超,我相信呢個係每位槍迷嘅夢想,我都好想你去感受下呢件人生必做嘅事。我知道拍拖呢兩年都冇咩俾到你,基層草根一條,唔夠浪漫又hea底。不過我好希望有日可以帶你去酋長球場睇波,參觀下呢個球場,等你感受下男人嘅浪漫,同6萬人一齊吶喊果種震撼。
知你鍾意手寫嘅野,你呢一刻係日本我地慶祝唔到兩週年,唔可以親手俾呢封信你。睇住手機版先,返黎去信箱收呢個真。手寫版。不過你可以睇番我之前啲文,我等你呢個文青俾啲意見我啊!
「你的寂寥和我的孤僻 這關係聯成幸福虛線
樂意被你改變 聯起兩個世界做彼此配件」
呢排俾黃劍文首《我們的》洗腦,我相信《我們的阿仙奴比卡超故事》一定可以延續落去。

收服阿仙奴比卡超的男主人上


「球場二三事」唔止講足球,諗到咩就講咩,Like埋個page支持下啊!

如果喜歡我們的文章,請即分享到︰

標籤: 阿仙奴  比卡超  球場二三事  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→