從維拉柏豪到日本陳豪:與球星相似的藝人最佳11人陣容

.精選專題. 於 14/03/2019 發表 收藏文章

阿士東維拉隊長基亞利殊在比賽中被衝入場內的伯明翰球迷重拳KO,近日成為新聞人物,有趣的是香港藝人周柏豪因此上報,不過是出現在體育版而非娛樂版。香港傳媒在報道這單遇襲事件時,紛紛提及周柏豪的名字,多過球員本名基亞利殊。

原因毋須多講,一睇就明。講起上來,香港有不少藝人樣貌酷肖外國球星,不但可以跨越種族,更不限性別、年齡,最神奇頂級超卓的是,竟然可以排出一個世界級陣容,如果有機會集合以下藝人拍張大合照,驟眼看可能以為是一隊新組成的超級班霸!

先睇陣容,唔睇下文,你又估唔估到呢個「最佳11人」係由邊啲似樣球星組成呢?

前鋒袁文傑、言承旭、張家輝

中場雷莊兒、陳友、甄子丹、周柏豪

後衛陳豪、張敬軒、容祖兒

門將吳鎮宇

袁文傑 與 馬里奧高美斯
相似度
: 🎭 🎭

前鋒線上首先出現嘅袁文傑都算同足球圈有些少關係,有球迷認為佢同今季回巢史特加嘅德國中鋒馬里奧高美斯相似。游生同高美斯雖然樣貌唔算好似,但面型、髪型都激似,頭髮嘅gel法同角度更係100%配對,身型亦係一樣,兩位型佬都有1米89身高,如果高美斯轉埋會過阿仙奴,咁就完美。
言承旭 與 杜奧巴
相似度
: 🎭 🎭 🎭 🎭

台灣前F4成員言承旭同巴哥真係好似,尤其係個口同輪廓,年紀又差唔多,有網民將佢哋兩個嘅相合成一齊,如果唔係膚色有唔同,根本分唔清邊個打邊個。

張家輝 與 美斯
相似度
: 🎭 🎭

好多人話張家輝似美斯,一個影帝,一個球王,呢個帝王組合夠哂睇頭,不過講真就唔覺好似樣噃,有一期美斯染金毛,同「渣渣輝」紋哂身個「陀地驅魔人」造型係幾似樣嘅,不過由於化骨龍扮朗拿度嘅一幕太過入腦,始終覺得佢係巴西球王唔係阿根廷囉!
雷莊兒 與 朗拿甸奴
相似度
: 🎭 🎭 🎭

有美斯又點可以冇佢好拍檔呢?哨牙蘇?非也!港媒封上屆港姐冠軍雷莊兒為女版蘇亞雷斯,對此實在不能苟同,唔係哨牙就一定似阿蘇架!你細心留意吓「兜兜」 嘅顴骨、笑容同下巴,毫無疑問係「細哨」家族成員!

陳友 與 奧斯爾
相似度
: 🎭 🎭 🎭

阿仙奴中場奧斯爾同溫拿成員陳友最相似嘅,當然係一對大眼睛同發出嘅佛系眼神,如果睇返陳友後生時個樣,就可撇除年齡上差距,睇到佢同「大眼仔」係一個餅印。
周柏豪 與 基亞利殊
相似度
: 🎭 🎭 🎭 🎭

柏豪同基亞利殊除咗個樣超似,髪型相似度更係冇得輸。另外亦有人話佢同比利時翼鋒卡拉斯高都幾似,又係髪型搭夠。另外仲有人覺得佢同皇馬左閘馬些路撞樣,睇落五官係有啲似,不過面型唔同,始終都係「維拉柏豪」貼切啲。

甄子丹 與 奧斯華度文達
相似度
: 🎭 🎭 🎭

講起厄瓜多爾國家隊,大家可能只識華倫西亞,但其實隊中有一名成員堪稱「宇宙最強」,佢就係外貎酷似甄子丹嘅中場奧斯華度文達。呢位南美版「宇宙最強」上季仲效力緊巴塞隆拿,不過唔係「地上最強」西甲巴塞,而係佢哋國內嗰隊巴塞。
容祖兒 與 艾辛
相似度
: 🎭 🎭 🎭 🎭 🎭

有巴哥自然唔少得艾辛,祖兒早已成為艾辛代名詞,兩個人性別、膚色唔同,但樣貎竟然高度仿真,祖兒仲要拉傷過大腿,連艾辛易傷呢個特徵都似埋,更試過自己po相問歌迷「是不是一模一樣呀」,真係夠哂大方,笑到人收唔到聲! (圖:蘋果日報)

張敬軒 與 比比
相似度
: 🎭 🎭

張敬軒認同球迷所言,承認自己似車路士翼鋒韋利安,不過橫睇掂睇都覺得,軒仔其實係前皇馬中堅比比至啱!睇返早年效力波圖時嘅比比,笑起上嚟十足十就係軒仔。比比今季都返咗波圖,唔知幾時會對馬賽呢?
陳豪 與 長友佑都
相似度
: 🎭 🎭 🎭 🎭

日本球迷見到陳豪會唔會覺得好面善?離開國際米蘭去咗加拉塔沙雷嘅長友佑都,雖然身高矮過Moses一截,但微笑時又係好似樣,最巧合係兩人唔止髪線位置差唔多,連留嘅鬚都係一式一樣,有圖有真相。(長友佑都又係咖啡達人?)

吳鎮宇 與 奧祖亞
相似度
: 🎭 🎭 🎭 🎭 🎭

把守最後一關,當然要留返最經典嘅呢一對。一個墨西哥人同一個香港人似樣成咁,已經匪夷所思,更神奇嘅係奧祖亞眉宇之間嗰種無奈得來帶點戇直嘅眼神,同Sam哥完全如出一轍,相似度爆哂燈,因此衍生出無數「二次創作」作品,唔怪得連鎮宇都話知道邊個係奧祖亞啦!
(參考資源: 本港各大報章及網上論壇)

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→