高佬祺隨筆：C朗的「那個專訪」

哀傷期，一般指人知悉親友離世嘅噩耗之後，由初步反應至最終適應接受嘅過程。哀傷期呢個概念，亦可以用嚟理解失去重要嘅人或事之後（例如失業、失戀等），人會作出嘅反應、會經歷嘅情緒思想等等。

點解無啦啦有咁嘅開場白。因為睇完C朗「那個專訪」，我最大嘅感覺，眼前受訪90分鐘嘅呢位球星，係一個經歷緊哀傷期嘅人。而且係初期。

首先係佢今年年中失去咗個仔。佢抱住BB女嘅同時，屋企嘅另一角落放住啊仔嘅骨灰。我諗冇人可以完全明白佢呢幾個月嚟嘅感受有幾複雜。可以肯定嘅係，呢種感受一定包含難以言喻嘅痛苦，對佢思緒、情感甚至人生觀都會有極大衝擊。呢種喪子之痛，常人一年半載都未必能夠完全平伏、消化、適應、接受。C朗亦唔會例外。所以無論佢本身身體或球技水平維持成點，佢呢段時期競技狀態都會受到好大嘅影響。而競技狀態嘅下滑，令C朗不得不同時面對另一方面嘅「哀悼」：佢嘅足球事業。
由C朗近年改變踢法、肯唔踢啲較次要嘅比賽等等，我相信C朗心知肚明，自己隨年紀增長，對比賽嘅統治力漸不如前。只不過，因年紀而倒退尚有大把方法調整以延長自己嘅足球生命，喪子之痛對競技狀態嘅打擊既急劇而且難以快速恢復。再適逢球會新帥上任，大幅減少佢出場時間之餘球隊戰績反而更好，輿論嘅壓力亦久高不下，C朗失去兒子之後，短時間內連踢足球嘅狀態、球隊內嘅位置、甚至喺球壇中嘅地位都失去埋。

經歷哀傷初期嘅人，處於一個非常脆弱嘅時期。佢哋會容易進入「求生模式」：傾向否認現實、敏感、易怒。要捱過呢個時期，好需要身邊嘅人無條件嘅支持。面臨雙重哀悼嘅C朗，我相信佢屋企人提供到呢種無條件嘅愛同支持；但足球界嘅呢個「家」，我諗就無咩可能。
如果以呢個角度去睇成件事，C朗嘅反應就容易理解得多。佢認為足球界嘅人大部分人都以佢為敵，佢唔理解昔日隊友對佢嘅批評，佢覺得球會唔相信佢家庭有事、出賣佢，佢認為領隊唔尊重佢、挑釁佢…我唔係想討論佢嘅睇法有幾「啱錯」或者「係咪符合事實」（呢啲道德批判，我覺得討論嚟都嘥氣，睇你喺球會定球員立場出發㗎啫，更何況大把私底下發生過嘅嘢根本無從證實，連批判嘅基礎都薄弱）。我只係想指出，如果C朗係喺咁嘅狀態下，我哋就多少可以理解佢對身邊嘅事情點解會有咁樣嘅詮釋演繹。「身邊嘅人唔支持佢就係敵人」，由此而來嘅憤恨日積月累。最終決定以一個爆炸性嘅專訪嚟反擊，呢個只係性格使然。有人嬲嘅時候會還擊，有人會躲避離開，都係選擇，無可無不可。

作為C朗迷兼全港最客觀理性鍠迷球評家，我關心嘅係佢嘅精神健康，當然亦希望佢可以多少重拾狀態踢好世界盃；喺獌，I mean，曼迷嘅角度，佢呢啲直頭係職業失德，實情要燒佢數簿；我諗，此時此刻難過嘅，應該係C朗兼曼聯嘅球迷。佢哋要哀悼嘅，係一段美滿嘅童話故事。