【港足大雜燴】 大埔新兵來投增強兵力  陳俊樂向球迷派定心丸

-
流浪再次尾段被扳平 立立怪外援頻受傷-
流浪聯賽面對大埔再次失諸交臂，繼盃賽對晉鋒之後又一次喺領先嘅情況比賽尾段失波，導致球隊未能全身而退。季前積極增兵，但係超聯開季三場以黎一場不勝，流浪總監李輝立接受訪問就表示球隊受外援受傷影響，所以球隊戰績未如理想，更強調會換外援。我覺得用外援受傷呢個解釋未免太牽強，流浪聯賽頭三場對手係理文、港會同埋大埔。理文嗰場流浪其實守得算ok，只係艾華頓太屈機。不過對港會、晉鋒同大埔都搞唔掂，就無乜藉口，怪外援就更係無稽之談。
-
先唔講係得兩個外援輪住受傷，就算你無外援都好，以流浪球員嘅華人班底，陣容加埋嘅質素都遠比嗰幾隊好。而且對大埔嗰場流浪成個上半場都控制大局，大埔製造到嘅威脅老實講非常有限，甚至流浪金玟哉嘅入波係由精彩嘅傳控足球而黎嘅，證明流浪就算無外援絕對有能力擊敗對手。去到下半場先突然崩盤，俾大埔反客為主圍攻，係證明球員心態放鬆咗，專注力不足。流浪要改嘅唔一定係球員名單，反而可能係球員心態。-
大埔又有巴西新援 準備合組「巴西四人幫」
-
至於流浪上場嘅對手大埔，反而開季以黎驚喜不斷，同球迷季前所想像嘅魚腩份子有強烈對比。除咗大勝同級對手深水埗之外，勇和東方同埋一球僅負爭標份子理文。大埔防守力比起想像中強得多，所有中後場球員企位都非常有紀律性，加上場上決心同信心超強，同深水埗非常唔同，唯一問題係前場得保連奴一個外援，而鄭子森同王力威呢啲攻擊球員侵略性有限，導致反擊力度唔足夠，令防線長期受壓，增加失波風險。大埔最近確定引入巴西翼鋒雷仙奴，佢廿六歲年輕力壯，加上係巴西人，應該有一定盤扭能力，如果佢帶黎一定侵略性的話，相信可以改善大埔現時攻力不足問題，從而減輕防線壓力，成績有望進一步穩步上揚。連埋雷仙奴，大埔已經有四個巴西人，可以組成大埔「巴西四人幫」-
陳俊樂親自解畫 僅需養傷個半月
-
港隊中場猛將陳俊樂向香港傳媒證實訓練嗰陣不幸受傷，經診斷後左膝半月板損傷，而應該只需要休養個半月，並非早前大陸傳媒早前所報導嘅「有機會影響出戰明年亞洲盃」。依照陳俊樂講法，到亞洲盃決賽週嗰陣應該晨早好番哂。相信香港主教練安達臣見到呢單新聞都會鬆一口氣，因為陳俊樂喺中場非常重要，大家之前都見識過東亞盃港隊中場有陳俊樂嗰陣運轉力強好多。喺度祝陳俊樂早日康復，下年健健康康出戰亞洲盃。
-
【港足大雜燴】，不定期短評幾則港足焦點新聞。