風車sir迎來執教生涯最艱難挑戰 精選

深水埗開季四連敗，最近兩場對傑志同大埔就更加加埋失波失咗超過一打，前主帥潘文迪亦意興闌珊辭別。兩日之後，深水埗官宣執教過香港U23代表隊、大埔、飛馬等球隊嘅「風車sir」郭嘉諾降臨救世，而風車sir今次嘅任務比起之前佢任何一份工都要困難。
-

首先深水埗開季以黎連場慘敗，先不敵業餘球會港會，其後分別0:4、0:10輸俾上游份子南區同傑志，最致命係最近嗰場1:5潰敗俾同級對手大埔。從球員身體語言黎睇，深水埗球員最近兩場信心已經幾乎盡失，士氣蕩然無存。阿風車sir之前佢教飛馬嗰陣就試過狠狠地公開責罵孫銘謙，試圖令孫銘謙狀態大提升，不過而家深水埗球員咁嘅精神面貘，狂鬧肯定無用，佢真係要諗諗計點樣可以令隊波重振聲威。

-

除咗信心危機之外，無可靠外援亦係另一個問題。係，深水埗係啱啱借咗流浪烏克蘭籍龍門奥力斯；係，深水埗陣中有位尼高拉斯計外援；係，深水埗仲簽咗個蒙古外援奥恩博……但係基本上呢班所謂外援都對大局無乜幫助。奥力斯喺流浪無錯係屈機，但條防線繼續踢到咁的話，再對傑志有奥力斯坐陣的話，最多咪失少一兩球，失唔到雙位數，對大局無乜幫助！至於其他計外援嘅奧恩博、尼高拉斯、簡兆威同泰亞高，全部睇落都未夠班立足喺港超，甚至貢獻仲細過本地球員。呢樣野對比阿風車sir教元朗、飛馬以至大埔嗰陣都好唔同。究竟喺無乜可靠外援之下，風車sir可唔可以撻番起闊別港超一年嘅羅港威同劉浩霖呢啲港超經驗戰將去撐起隊波呢？
-

風車sir喺訪問嗰陣好強調想隊波做到攻守平衡，唔可以淨係防守，認為前場進攻做好啲，就可以減輕防線壓力，但問題係深水埗呢幾場已經打低位防線，都可以搞到錯漏百出。如果成隊再壓前啲，代表後防空位再多啲，會唔會造成更多失誤，更多更恐怖嘅失波呢？風車sir若果想要隊波做到攻守平衡，真係唔係咁易……

-

點都好，風車sir本來可以繼續輕輕鬆鬆喺足球學校教細路同喺電視台度講波。佢選擇出山接過深入泥澤嘅深水埗帥印，猶如用個人聲譽作賭注。假如事與願違，郭嘉諾救火失敗，想玩進取啲而令隊波輸到十四五球嘅話，之前喺元朗飛馬儲落黎嘅credibility 隨時一鋪清袋。佢夠膽呢個時候接過帥位，都算係勇氣可嘉。