施斯的神奇旅途：四星期由難民隊到意甲入球奠勝 精選

尋日喺西班牙國家打吡嘅同一時間，一個童話故事正喺意大利同時間上演：年僅十八歲嘅施斯處子戰幫阿特蘭大攻入奠勝球。

年僅十八歲嘅小將施斯四星期前仲踢梗位於意大利第八級聯賽嘅難民隊。上個月佢喺一場面對意乙球隊友賽表現出眾，吸引阿特蘭大球探注意，得到機會加盟阿特蘭大青年軍，從此改變咗佢嘅人生。


施斯上月加阿特蘭大青年軍後迅速融入球隊，首場面對米蘭青年軍就已經梅開二度，及後今個月對拿玻里青年軍亦攻入全場唯一入球。如此嘅表現成功打動阿特蘭大一隊主帥加斯柏連尼升佢上一隊訓練。


近期阿特蘭大喺意甲表現走樣，賽前近八場聯賽得一勝。主要原因係球隊各位前線得分手都出現各種問題，伊利錫心理疾患持續、Zapata則長期長抖，至於可以正選掛帥嘅梅利爾就長期狀態低迷。喺球隊急需一場勝仗、面對博洛尼亞久攻不下之際，主帥加斯柏連尼決定放手一博喺六十五分鐘，換走狀態一般嘅梅利爾，派上啱啱先升上一隊嘅施斯。結果施斯不負所托，八十二分鐘射入奠勝球，報答主帥加斯柏連尼。

由效力難民隊到幫阿特蘭大一隊入波，中間過程就只有四星期。人生有時候真係好奇妙，機會有時候話黎就黎。