大量技術型球員入選 耳目一新港隊將誕生？ 精選

最近港府再一次收緊防疫政策，導致香港本土足球賽事又要面對停擺嘅局面。喺呢個停擺時刻新任港隊主教練安達臣卻正式抵港履新，並進行咗線上記者會；而根據傳媒報導，安達臣本身更係已經選咗三十名球員，準備安排集訓備戰亞洲杯外圍賽。
不過安達臣上任之後港隊一場都未踢，就已經製造咗啲noise。原因係佢喺記者會上豪不忌諱，公開質疑上任教練麥柏倫嘅戰術佈處，認為麥柏倫過於保守。安達臣之後喺記者會仲要聲大大應承港隊球迷會踢得進取啲。「我睇過近10場港隊比賽，發現咗一啲唔想見到嘅情況，包括喺某啲比賽中過於保守，咁樣好難贏波，我會讓球隊踢得進取啲，防守嘅時後將防線推前啲，嘗試對對手進行緊逼，呢樣會係我首要任務。」＊此對白Quote自東方日報

呢番言論引黎唔少球迷嘅反彈，唔同嘅討論區都有唔少冷嘲熱諷嘅負面留言，認為安達臣想法不設實際，亦有人認為佢得個講字，真實落場踢又會泊大巴；就連前港隊隊長陳偉豪都喺Facebook開post笑埋一份，表示「其實港隊踢法一向都唔係傾向保守，只不過係進取唔到啫😂😂😂」
面對球迷嘅質疑，流出嘅30人集訓名單就猶如安達臣對球迷嘅一個強烈訊號。今次30人名單裡面，意外地有大量技術型球員。例如以往不受港隊青睞嘅鄭展龍同陳肇鈞兩位技術型中場一齊有入選，就連流浪腳法細膩嘅年輕小將余在言都有機會出現喺名單裡面。由此可以推斷，安達臣堅係有改革決心，想打造一支耳目一新嘅港隊。

若果安達臣確實係要革新港隊嘅踢法，要拆解嘅難題並唔少。港隊球員體能縱使近年有所改善，但要將球隊防線推前，「嘗試對對手進行緊逼」，並唔會可以一時三刻做到，球員都要慢慢適應。就如蘭歷克季中接過曼聯帥位，甫上位就聲言要將曼聯便成一支逼搶球隊，但係都而家都仲慢慢一路修正調整梗，距離成為一支正式逼搶球隊，仲有一段路要走。世界級球星都要慢慢調整，何況我地講梗嘅係香港球員呢？可以改造到港隊，對本港足運發展固然好，但可以預見嘅係，只要安達臣一嘗試要求港隊推前啲條防線，就隨時會輸幾場大大鑊。到時港隊球迷未必會接受到、香港足總高層見到啲咁嘅比數亦會一定諗法，有可能會影響安達臣自身續約機會。安達臣可唔可以頂定壓力，迎難而上呢？大家拭目以待，不過而家相信無論球員、球迷定教練，都希望香港球場可以早日解封。如果唔係，連波都無得踢，講乜都無用！