卓耀國已與港足無關 更遑論體壇年度十大

尋日資深撰稿人施建章喺蘋果日報前體記記者組成「體壹」嘅個人專欄中，將卓耀國還押列入香港本年度體壇十件大事之一，而其他入選佢十件大事嘅港足事件亦都無一正面，令其備受香港波球迷批評，事件持續發酵令佢要翌日（即係今日）急急浦頭「解畫」。

觀乎佢喺專欄所寫嘅十件體壇大事，超過一半都無太大問題，而其中港足小將鬧事亦的確離譜，被施建章列入體壇十大事件亦無可厚非。不過有三項事件我就覺得十分值得商確：「蘋果體育被結束」、「港超球會欠薪」以及爭議最大嘅「卓耀國一錯再錯」。


首先呢「蘋果體育被結束」同體壇根本無乜關係，體壇十件大事至少要係體壇裡面嘅事吖嘛...蘋果體育組解散主因係香港政府用國安法條例凍結佢總公司壹傳媒資產，好明顯唔係屬於體育版嘅新聞，寫落去十件體壇大事完全九唔搭八。有網民留言話唔太關體壇事，佢竟然回應話應該寫落成個香港十件大事，不過佢怕寫完俾人拉。咁咪唔好寫囉，硬塞落呢篇文到做乜啫？另外「港超球會欠薪」其實亦唔算係乜大新聞，究竟有邊年係會有香港球隊唔散班、自降或者欠薪呢？跟咗體育版咁多年，施建章無理由唔知呱？

講到最離譜都係要數到將「卓耀國一錯再錯」放入十大體壇事件裡面。我認同廣大網民嘅意見，卓耀國根本同香港足球再無乜關係。施建章撰文反駁話卓耀國曾經係香港明日之星，犯錯後有機會但唔珍惜，更加反問球迷「這是常見的香港體育新聞？」我想講時光飛逝，卓耀國已經成廿七歲，一早已經再唔係乜鬼明日之星。佢兩年無喺超聯落班，還押前已經無存在喺職業球圈，只係一個業餘球員，佢所做嘅任何事都唔再應該關體壇事。況且卓耀國咁多年黎，只係為港隊正規國際A級賽事出過三十幾分鐘場，論成就鄭兆鈞同孫銘謙都放甩阿卓生成條街。關注卓耀國係度做乜白痴嘢當然可以，但係就唔好重視到放喺十大事件當中囉。


拙文開首提到施建章「浦頭」回應，但其實佢根本完全捍衛自己觀點，以言論自由作包裝，死雞撐飯蓋完全唔覺得自己有問題之餘，態度囂張。只係用極其暴躁嘅詞調解釋自己提出嗰十件事嘅原因，各網民所提出嘅其他大事，完全懶得反駁。有網民甚至指自己嘅帳戶因為批評施建章而遭到佢封鎖以及删留言，自己要喺體壇十件事加入蘋果日報事件，然後自己又做埋哂啲咁嘅嘢，好笑呀真係！

最後體壹嗰回應仲好笑話乜「香港足球的亂象同時叫我們扎心」、「槍口更多是指向當權者」。究竟你地班體記喺度嗡乜Q? 香港足球2021年有咁多大事你唔放，你係要放唔關事嘅卓耀國落去？仲有寫卓耀國單嘢落去點樣算「指向當權者」呢請問？香港足球2021有乜其他大事呢？Let's see.傑志簽到亞冠盃歷史紀錄射手丹恩奴域唔講，傑克亞冠拎十幾分亦唔講，理文亞協四強僅敗又唔講，梁諾恆破香港球員轉會費紀錄又唔講，港超入場人數破紀錄同樣唔講！以上幾件事點都大件事過卓耀國入冊呱？作為媒體人好應該持平客觀囉，你條友咁寫法，好難唔相信你唔係踩梗香港足球！本來都唔太想寫啲乜，但係睇完體壹同施建章嘅回應，真係火到黎。