細細個因為臀部疾病要坐喺輪椅足足兩年，幾經辛苦成為職業足球員之後浮浮沉沉，到廿七歲都只係踢英冠嘅米杜士堡...但係今時今日廿九歲嘅佢，已經做咗球皇美斯嘅隊友，效力梗嘅係鼎鼎大名嘅西甲班霸巴塞隆拿。
-
上述嘅劇情並唔係咩電影、電視劇或者咩童話故事度抽出黎，而係巴塞9號球員巴夫韋治真真正正嘅故事。
-
.
.
-
巴夫韋治嘅足球路途比起好多其他球員都要崎嶇，皆因佢細個嗰陣曾經患上臀部疾病，臀部需要長期受保護，導致要坐輪椅生活成兩年。巴夫韋治好希望踢波，佢甚至成日想趁父母見唔到嗰陣離開張輪椅。終於有日佢離開咗張輪椅，但係佢爸爸就睇見就好傷心。因為巴夫韋治係就係跑緊，但係就好似跛嘅一樣，一路拐下拐下...
-
雖然一路拐下拐下，不過皇天不負有心人，俾巴夫韋治拐到條出路，成為一個職業足球員。佢仲要喺法甲踢出一片天，高水準嘅表現，吸引英冠爭升班嘅米杜士堡高價收購佢。
-
咁當時係2017年啦，米杜士堡為咗爭取升番班上英超，作出咗幾單重榜收購，而巴夫韋治就係其中嘅一人。嗱，據報當時巴夫韋治單交易嘅轉會費高達九百萬英鎊。睇慣英超嘅大家要知道，呢個數字喺英冠黎講，其實真係相當之高。咁巴夫韋治啱啱加盟米杜士堡嗰陣信心非常之強，竟然將佢自己同米杜士堡傳奇祖連奴比較！
-
不過信心強還信心強，巴夫韋治喺米杜士堡嘅時間並唔太順利。佢整個米杜士堡時期總共四十次出場只能射入九球，仲要提出transfer request 兩次。
-
其實一開始嗰陣，喺時任領隊蒙克揮下，還好嘅，巴夫韋治都叫展現到佢嘅class。可惜蒙克捱唔得耐，好快就俾普里斯取代咗，直接令巴夫韋治命運扭轉。普里斯駕到之後，巴夫韋治僅僅上陣三次之後，就俾外借到法甲嘅波爾多。
-
外借回歸之後嘅2018/2019球季，巴夫韋治頭四場英冠入咗三球。正當一切踏入正軌嘅時候，佢就竟然喺轉會窗完之前提出離隊請求，不過就俾米杜士堡拒絕咗。然之後接下黎嗰十四場英冠比賽，佢就一球都再無入過。
-
到咗冬季轉會窗，巴夫韋治終於獲得球會放行，外借加盟西甲嘅雷根尼斯。佢喺外借期間表現唔錇，對皇馬巴塞都入到波。不過去到外借嘅中段2019年3月，巴夫韋治就放狠話，表明佢唔會回歸米杜士堡，更加直接抽擊教練普里斯嘅戰術。
-
普利斯得知之後非常憤怒，斥責巴夫韋治係一個狼心狗肺嘅球員。米杜士堡嘅球迷同樣被激怒，有米杜士堡球迷喺Twitter表示從今以後場場撐雷根尼斯嘅對家。
-
到咗2019年嘅夏天，巴夫韋治終於離開米杜士堡，正式加盟雷根尼斯。
-
巴夫韋治離開之後，就咁樣形容米杜士堡嘅時期：「我地都係人類，而足球係充滿情緒嘅。米杜士堡球迷係幾熱情既，而我鐘意呢點。我個人相信言論自由，球迷有自由去表達自己嘅失望。親近我嘅人知道我嘅價值，可惜嘅係有人試圖抹黑我。」
-
接下黎嘅故事發展係一般人都難以想像嘅，喺正式加盟雷根利斯半季後，佢突然湊仔嗰陣接到一個黎自經理人嘅震撼消息：西甲班霸巴塞隆拿因為蘇亞雷斯受傷，突然對佢展現出濃厚嘅興趣。巴夫韋治表示佢當時盡力嘗試克制，忍住內心嘅衝動。因為佢知道喺足球世界，「展現興趣」並唔代表啲乜。
-
接下黎嘅日子，巴夫韋治意識到巴塞對佢嘅興趣係堅嘅，談判亦都隨即展開。不過喺落實簽字之前，佢要依舊保持鎮定，每日如常去雷根利斯練波同隨隊比賽。嗰段時間裡面，巴夫韋治非常低調咁處理談判，嗰陣就連佢老婆都唔知呢單嘢，見佢成日傾電話，以為係有外遇！
-
不過好在，最終巴夫韋治成功加盟巴塞，唔係家變都似！其實巴夫韋治一直都好有自信，非常嚮往歐洲賽，認為自己終有一日會加盟歐洲列強。話說佢仲喺法甲嘅時候，就曾經喺日記薄度寫低自己嘅目標，要喺廿七、八歲效力一支傳統班霸。就連佢身邊嘅人都未必相信佢會真係做得到，勢估唔到佢就真係正正廿七歲加盟巴塞。
-
加盟巴塞之後，巴夫韋治以自己能力，已經嘗試做到最好。佢都叫做入到吓波，同埋一啲助攻嘅，今季仲要繼承埋離隊嘅蘇亞雷斯嘅九號波衫。至於數到最威水就應該係喺國皇盃四強射入奠勝球，協助球隊淘汰西維爾進入決賽呀。
-
巴夫韋治係史上第五位丹麥球員效力巴塞，而家仲要著住以往「黑豹」伊度奥同巴西傳奇朗拿度嘅巴塞九號球衣。回想番佢曾經坐過兩年輪椅，呢個旅途實在係難以置信。不過呢一刻佢都唔諗得咁多，要盡力喺巴塞爭取上陣時間，準備2020年歐洲國家盃。
-
你可能話其實一切都只係運氣，如果唔係蘇亞雷斯失雞無神受傷，以佢邊有可能加盟巴塞啫！無可否認，佢加盟巴塞係有運氣協助，但係若非佢之前嘅努力，運氣又點會黎到呢？
-
喺加盟巴塞之後，有巴塞職員同教練都話，從末見過一個球員可以有咁多問題。巴夫韋治幾乎係不斷問問題，佢嘅好奇心同好學精神，引黎唔少職員同教練嘅尊重。仲有上年lockdown嗰陣，可能有唔少球員都會惰惰閒，但係巴夫韋治就反而日以繼夜去睇比賽片，甚至去研究其他運動嘅技術可唔可以應用落足球，佢搞咁多嘢都只係想落場嘅時候可以發揮得好啲。
-
巴夫韋治球技固然唔及佢嘅巴塞隊友花巧，但係佢嘅態度同自信可能係隊裡面數一數二嘅，落場嘅時候一定俾足您100%，或者正正係呢一樣嘢說服到巴塞隆拿收購佢。有時候運氣，都係可以自己製造嘅。只要你全心全意落力去做好每一件事，時間到了，自然會有回報。
請按此登錄後留言。未成為會員? 立即註冊