武磊登場後反勝為敗 六分鐘連失兩球I 守拙看球手記-
西乙話咁快就嚟到第十三週嘅賽事，星期五晚尾場就有「加泰打吡」，由愛斯賓奴主場迎戰基羅納。愛斯賓奴近況唔錯，喺前馬略卡教練Vincente Moreno帶領之下，賽前已經六場不敗，並且進佔榜首；相反基羅納賽前就已經連續四場未贏過，狀態令人擔心。
-
雙方正選陣容 (右至左)
-
愛斯賓奴 4231
GK Diego Lopez
DF Migueron Calero Cabrera Vila
DM David Lopez Darder
MF Embarba Melendo M.Vargas
ST R.De Tomas-
基羅納 442
GK J.Carlos
DF Couto Bueno Bernardo Franquesa
MF Barcenas Monchu Cristoforo P.Moreno
ST Pachon Samu Saiz
-
今場一開波，主隊愛斯賓奴隨即主導比賽。愛斯賓奴一度拎到超過六成五控球率，但係第一個有威脅埋門係黎自基羅納。十分鐘愛斯賓奴喺前場有罰球，R.De Tomas主射省中人牆，嗰波彈出黎之後輾轉彈咗去基羅納前鋒Samu Saiz度，佢攞到嗰波就一路推到對面禁區頂再自己射埋，嗰波僅僅柱邊出界。
-
四分鐘之後，形勢較為主動嘅愛斯賓奴終於有個似樣嘅攻勢。R.De Tomas俾幾名基羅納後衛圍住，佢斜傳俾後上cut 入嘅翼鋒Vargas，Vargas推咗幾推之後斬中，點知個波貼門得濟直接飛向近柱，對面龍門J.Carlos失失哋位之下，只能夠狼狽地撲出。-
去到廿一分鐘，愛斯賓奴中場Embarba開出角球，Cabrera喺前柱位置篤到嗰波，但考唔起對面龍門J.Carlos。無幾耐之後，又係一個角球機會，落點再次喺前柱位，今次由David Lopez批向遠處，但係R.De Tomas喺遠柱嘅補射又過唔到對面龍門J.Carlos。
-
之後好一般時間雙方都無真正有威脅埋門，再黎就已經係三十九分鐘。三十九分鐘，Embarba右路K角位附近傳中，R.De Tomas胸口一控，再好冷靜盪個波入網，協助愛斯賓奴完上半場前領先1:0。
-
下半場一開始基羅納明顯壓得前左，令比賽變得開放，佢哋四十七分鐘有中堅Bueno俾個靚直線，前鋒Pachon拎到嗰波之後，自己一路推進，過咗五六七關，連愛斯賓奴龍門Diego Lopez都過埋！點知……佢竟然射中條柱！！！不過好彩之後旁證舉番越位旗...佢應該鬆番口氣。-
五十三分鐘，基羅納中場Monchu疑似喺自己禁區裡面侵犯對手前鋒R.De Tomas，球證做手勢表示無犯規。睇番重播，Monchu的確有接觸R.De Tomas，不過動作唔算太大，球證唔判十二碼都叫做合理，而既然無十二碼，基羅納隨即展開攻勢。Samu Saiz繼上半場之後，又再次由自己半場一路推進到射程範圍，今次更加入埋禁區，但係射門又係略門而過。
-
去到七十七分鐘，後備上陣嘅愛斯賓奴中場Medita俾靚直線，不過接應嘅R.De Tomas撻Q…八十一分鐘，愛斯賓奴中場Melendo受傷，主教練派武磊上場，並將陣式調整成442，試圖以多個進攻球員黎牽制對手。
-
八十二分鐘，R.De Tomas策動反擊，Puado左路入楔接應，可惜射得太正。基羅納好快就反擊，右中場Barcenas推過幾個人之後，擺個大位一Ban，個波直飛龍門右下角入網！比數被改寫為1:1。-
禍不單行，愛斯賓奴後衛Cabera五分鐘後侵犯對手上前助攻嘅後防Bueno，球證直指十二碼點。今場波浪費咗兩個黃金機會嘅Samu Saiz終於放到個波入網，喺87分鐘協助基羅納戲劇性反超前2:1。愛斯賓奴之後谷前試圖製造混亂，都係無功而還，又一次主場輸俾基羅納。
-
其實今場愛斯賓奴反勝為負係咎由自取，佢哋直至六十分鐘之前都踢得好，去到下半場中後段就突然走哂樣。最致命係球隊去到八十分鐘之後，教練同球員都完全唔知諗梗乜。
-
去到八十一分鐘，球隊本身領先梗，有乜理由中場Melendo傷出，教練Vincente Moreno走去叫武磊取代佢？Melendo喺中場貢獻咁多，除咗引球推進、後上入楔，佢其實會回防幫手遮線。
-
嗰刻你已經有R.De Tomas同Puado回防意識差嘅兩個進攻球員，再換武磊出場究竟有乜謂呢？武磊一上場，中場突然少咗個人，仲要係活動範圍大既，點會唔出事呢?再講呀，領先梗嘅時候，八十二分鐘個攻勢壓到咁上做乜。一野俾人打番轉頭，仲要失埋波添！我完全理解唔到佢哋做緊乜？-
至於基羅納，我覺得佢哋成功反勝，實在有賴對手臨尾發癲。雖然經過調整之後，下半場佢哋有所改善，但係我依然認為基羅納進攻欠缺一定嘅銳利度。佢哋應該研究下要點樣更有效組織攻勢，而唔係一味靠反擊或者長傳先威脅到對手。
-
呢場波個戰果，我覺得可能和波會合理少少。不過點都好啦，呢場波其實節奏算快，而且比賽水平都幾高下，叫做幾好睇嘅！
-
請按此登錄後留言。未成為會員? 立即註冊