港超第一周第二個比賽日有三場比賽舉行，三場都係唔同時段、唔同地區比賽，球迷想睇哂就要疲於奔命。今次就同大家講下第二個比賽日其中嘅兩場比賽。
Game day 2
8月31日
Match 2 17:30
元朗 vs 東方
今季有志家軍來投嘅東方可以話係上年大埔嘅強化版，絕對唔惹小。雖然無伊高沙杜尼，但係基本上大埔其他骨幹成員都喺度，加埋本身東方擁有葉鴻輝、迪高、梁振邦等人，又有胡晉銘加盟，中後場攔截能力、穩陣度都比上年大埔好。前線方面亦有艾華頓、慕沙兩名有能力嘅球員，可以喺前場用個人能力產生威脅。今季東方應該會攻守兼備，面對再次被拆骨嘅元朗，理應可以輕鬆取勝。
守拙預測 元朗0:2東方
Game day 2
8月31日
Match 3 20:00
南區 vs 流浪
南區以往都玩開防守足球，都係先穩守泊大巴，再諗計進攻。不過今季一反常態，引入多名攻擊力強嘅球員，包括陳肇均、陳廣豪同埋查維斯，配上本身已經喺球隊嘅高美斯、迪亞高同埋夏志明，加上羅致了出擊力強嘅閘位球員積斯利，似乎新一季有大打進攻足球打算。不過打防反同做主導一方控球在腳係好唔同嘅取態，或者球隊要一段時間先適應到，第一場面對升班馬流浪，未必可以咁快夾得到，有失分嘅可能。
流浪方面雖然係臨時頂上，兼得400萬班費，不過陣容都有番咁上下，後防有杜馬思、中場有安達、彭林林同歐陽耀沖，前場亦都有安基斯，全部都有超聯經驗同一定實力，絕對唔可以睇少。第一場面對南區，應該會用即食嘅防反取態，適逢對方轉踢法，需要適應期，流浪或者可以有偷雞搶分，慶祝佢哋回歸港超！
守拙預測 南區 0:0流浪
請按此登錄後留言。未成為會員? 立即註冊