冠軍六分波 精選

【港足話題】聯賽六分波
預測：南區大勝

今個禮拜有一場聯賽冠軍關鍵戰，打多一場有30分嘅傑志，將會同打少一場存28分嘅冠忠南區正面交鋒，可以話係爭冠六分波！

傑志周中亞協盃賽事面對和富大埔賽事體力消耗其實頗大，早早落後兩球，全隊之後用盡九牛二虎之力先追和，點知臨尾對面仲有氣有力扭過你啲後衛，結果都係輸波收場。體力消耗咗之餘，2:4落敗兼陷票價過高爭議，傑志隊內士氣受損實在係難以避免！相反冠忠南區上場足總盃淘汰R&F富力之後士氣高昂，周中亦無任何比賽，無論士氣或是體力，都一定比對方好！

費蘭度喺亞協博到盡、盧卡斯又先啱啱傷癒復出狀態成疑，兩大進攻主力都未必有100%體力同狀態下，傑志今場攻力實在難以睇好。加上冠忠南區主帥鄭兆聰取態一向保守，必定要求球隊收縮後防線，唔會做太多壓迫，令對方無乜空位插入。傑志前鋒盧卡斯就係善於尋找球場空位再接應長傳向空位衝刺揾著數，喺對面嚴謹防守泊大巴、狀態亦未必十足下，相信佢會無啖好食！
今季傑志後防球員普遍速度較慢，今季已經多次俾速度快球員玩弄，盡出洋相！上場哈利、伊高沙托尼都係話過就過……今場傑志急需取3分，估計取態會比較積極。積極嘅話，即係球隊後防都會開得比較上，後面會比較多空位……多空位，蘇沙同夏志明兩名狀態大勇進攻球員就好容易進行到快速反擊，傑志後防咁慢，蘇沙同夏志明隨時可能會話過就過，運到前線又有把握能力強嘅Mr right 高美斯，南區完全有足夠條件用防反打爆傑志，所以我估計傑志今場難免大敗一場！

當然以上只係我本人嘅預測，實情係點？星期一入旺角場睇波啦！


_____________________________________________________
Follow 守拙 :
Facebook page : https://www.facebook.com/staystupidhk/
Instagram. : https://www.instagram.com/staystupidhk/
Fanpiece 專欄 : https://www.fanpiece.com/profile/u263539.html
youtube:https://www.youtube.com/channel/UCC3PSJObbl2xjd7DCNEGBBg/videos?view=0&sort=dd&shelf_id=0&view_as=subscriber