泰迪若北上失敗 應該直接判富力輸 精選 推薦

（圖片來源：傑志）

上個禮拜效力阿積士嘅泰迪喺歐聯招風喚雨，佢球皇級嘅表現令西甲皇家馬德里主場班拿貝球場迅間變身阿積士嘅球場，球隊最後4:1大勝輕鬆淘汰對方。阿積士嗰個泰迪絕對係嗰場比賽裡面風雲人物，不過喺港超踢傑志同樣叫泰迪嘅進攻球員，想做風雲人物都無得做。
今季富力第三季參加港超，球隊今季主場繼續放喺中國大陸境內嘅燕子崗體育場，而非香港境內。今個周未傑志依賽程係會北上中國大陸作客挑戰富力，不過最終係咪可以順利舉行仍然存在不穩定因素。點解呢？

本身主場放喺中國大陸本身就惹黎爭議，不過之前比賽都可以順利舉行。好景不常，時至今日終於迎來問題。傑志會長伍健喺社交網站facebook講，泰迪因為曾經入過土耳其而拎唔到中國簽證！土耳其最近因為新疆問題而與中國關係惡化，中國亦因此報復，唔俾喺土耳其長期居留過人士入境。泰迪正好效力過土耳其，所以一定長期居留過土耳其，相信係遭中國政府拒絕入境原因之一。
我認為香港足總同富力R&F必須儘快解決問題。泰迪本身喺本地賽有註冊合資格球員、香港工作證無出現問題，身體健康下根本上係絕對可以喺本地賽場上上陣。如果最終未能上陣，對傑志係絕對唔公平，尤其係少咗一個外援。富力本身已經係有特權將中國球員當成本地球員，又要求可以將主場放喺中國大陸，就絕對有責任確保保客隊球員可以順利北上參與比賽。喺中超參賽嘅嗰隊富力就有一個外援曾經長期效力過土耳其球會，顯示佢哋根本有能力解決呢個問題。若果最終泰迪未能入境，即係表示富力並無負責地盡力解決問題，比賽並唔會喺公平情況下展開。由於係富力一方導致比賽唔可以喺公平情況下舉行，比賽並唔應該延期或者轉移到其他場地比賽，以免產生其他不公平情況出現。足總係應該作出最公平裁決，直接判決富力不戰而敗。

其實傑志對富力呢場比賽相當重要，只要傑志能夠擊敗富力，佢哋就會追到同富力同分！我當然希望呢場關鍵大戰最終能夠公平情況之下展開比賽，但係若果泰迪最終未能夠上陣，最合理做法亦只有判富力輸波，絕對唔應該讓步。因為只要開左先例，之後就可能有其他不公平情況引用呢次案例去話比賽可以照常舉行。