上季護級戰中掙扎 今季反轉班拿貝 精選

皇馬爆冷輸俾阿積士，比賽裡面最搶眼嘅一定係泰迪。擁有唔錯嘅視野、傳球能力、盤扭能力嘅佢，喺班拿貝表現近乎完美，喺前場產生極大威脅。成場比賽有神一樣嘅表現嘅佢交出兩個助攻、一個入球，你可能問打到咁鬼勁，點會仲係踢荷甲㗎。其實佢上年就係踢英超嘅，只不過係效力護級嘅修咸頓。
2014年泰迪由荷甲川迪轉會到英超修咸頓，起初一黎到表現都幾搶眼下，經常有好表現。英超處子戰對陣利物浦就已經交出一個靚助攻，及後聯賽盃對阿仙奴亦都有波入成功幫球隊晉級，聯賽對曼聯更加射入致勝球！佢喺英超一直交出上佳嘅演出，成功令佢一直坐穩修咸頓嘅正選席位，亦係修咸頓可以連續位處於中上游嘅功臣。甚至有評論認為，佢係繼拿鐵斯之後，修咸頓最有實力嘅球員。

不過到咗上季，修咸頓整體表現令人失望，只能僅僅護級成功，加上下半季教練曉士比較保守，球隊無咁多攻勢，令到泰迪感覺上冇之前嗰幾季咁搶眼。不過泰迪上季都仍然交出六個入波三個助攻，整體表現亦唔算差，喺前場依舊製造唔少威脅，平均每場都會製造到大約1.4個黃金入球機會。以效力一支護級隊黎講，都算係非常唔錯。
今季修咸頓季初竟然間將佢放售到荷甲強隊阿積士，轉會費亦僅僅大約一千萬多啲。今季黎到阿積士隨即成為主力球員，喺荷甲射入十六球，歐聯亦已經入咗六球，啱啱仲要玩轉班拿貝！有時足球真係好奇妙，一個上季喺英超為護級苦苦掙扎嘅人，今季竟然喺歐聯玩弄皇馬後防線！不過修咸頓今季依然有護級危機，有冇後悔到咁輕易放走咗一個咁有級數嘅泰迪呢？