東方本可大勝飛馬 可惜艾華頓太獨食

守拙 於 02/03/2019 發表 收藏文章

飛馬主場迎戰東方龍獅,以2:2打和完場,可以話係兩敗俱傷嘅結果。兩隊賽前仍然有一定機會去爭取港超聯賽冠軍寶座,不過經歷呢一次和波,兩隊要拎到聯賽冠軍嘅機會已經接近無可能。

上場慘敗傑志嘅飛馬雖然後防線仍然錯漏百出,不過今場正選前場有出佐佐木周去左飛右撲,整隊亦加大咗壓迫強度,令球隊同對方互有攻守,後防線就冇咁長期受壓,自然無咁大機會犯錯。只係今日最終後防企位有問題都要失兩球……唔同嘅係,今場肯係前場迫,所以前面都入得番2球,先唔洗輸波。有個問題亦值得教練陳浩然注意,自從中場利馬走咗之後,飛馬組織能力大減。會唔會試吓出多啲有組織能力嘅蕭俊銘,增強球隊組織能力呢?

至於東方,今場後防少咗自爆,前場組織亦做得比之前好,前場都有唔少機會可以入波,不過最終喺「作客」旺角場要失兩分……問題其實唔多唔少落喺艾華頓身上。今日艾華頓三番四次都好獨食,明明幾次喺邊線扭過對方閘位球員之後,如果傳番入中間有一大堆隊友接應,偏偏佢就要每次都自己窄角色射。對自己有信心無疑係好事,但係都要學識信下隊友。你橫傳俾隊友嘗試tap in,點都易過自己窄角度射!可能之前踢開弱隊,艾華頓慣咗前場得佢自己一個搞掂哂。不過去到強隊,前面參與進攻球員至少有三到四個,你唔可能獨佔大旗,你要學識同隊友配合吓先得,始終足球係一個團體運動。

東方、飛馬今場失分,最開心一定係傑志㗎啦!至少旺角場做主場呢樣野,保得主!

留言


請按此登錄後留言。未成為會員? 立即註冊
    快捷鍵:←
    快捷鍵:→