中場無人用,蘇斯克查點解決好?

守拙 於 26/02/2019 發表 收藏文章

曼聯最近大戰連場,進入傷兵名單嘅球員越來越多。喺馬迪、馬達同靴里拉都受傷之下,中場可以用嘅球員可以話係捉襟見肘。嚟梗密集嘅賽程,曼聯又可以點樣應付呢?

一、試用青年軍

拉舒褔特、連格特等人都係靠2015/2016球季有一排傷兵好多嗰陣獲得上陣機會並且打得唔錯先上位。試想下如果當初領隊唔嘗試用吓呢兩位青年軍,今時今日佢哋可能過梗外借生涯,甚至俾人賣咗去英冠。好多時候,年輕球員就只欠一個機會。安祖高美斯、格賓、加拿、格爾活特,甚至鐘達希都係有啲潛力嘅球員。話唔定呢個時候俾吓機會登場,佢哋會大放異彩。

二、叫鐘斯打中場

其實菲爾鐘斯打中場,可以係一個可行嘅選擇。費格遜時代嗰陣,佢成日客串右閘同防中㗎喇。佢打中堅好多時勇過頭,太早出黎剎波,搞到失哂位。防守嗰陣,中堅失位其實會令隊波好牙煙。如果推佢上中場,佢剎波失敗,都仲有後防幫佢補位。加上佢用球能力亦唔太差,相信可以打到防中。「窮則變,變則通。」可能變一變,單車變摩托,鐘斯搵到第二春呢~ who knows ?

三、簽卡巴耶做吓替工

如果信唔過自家青年軍,又唔想將鐘斯改造,簽卡巴耶做吓替工都係一個選擇。卡巴耶現時係自由身,係可以即刻加盟嘅。卡巴耶6號位同8號位都打得,有一定派牌同串連中前場能力。佢亦有歐聯同國際賽經驗,簽番黎做吓後備,加強板凳深度,絕對唔會係乜壞事。


當然以上方法純屬小弟建議,但係中場人腳真係唔係太夠用,曼聯主帥蘇斯克查一定要諗吓辦法喇。再場場同一堆人,隨時普巴都傷埋!

留言


請按此登錄後留言。未成為會員? 立即註冊
    快捷鍵:←
    快捷鍵:→