祖赫特黑氣纏身 應該去見下蘇民峰或者麥玲玲

般尼踏入2019年狀態大勇，2019年開始之後，喺英超一場都未輸過……全隊都會為球隊嘅回勇而開心。不過有人歡喜，都有人愁。愁嗰個，咪就會係鼎鼎大名嘅前英格蘭國門祖赫特。
祖赫特自從因為腳下功夫唔夠好，俾曼城領隊逐出師門之後，都可以話運氣都唔係幾好。16/17球季，借去意甲拖連奴，表現一般，季後又俾人彈番去曼城。

17/18球季，曼城就將佢借咗去同樣喺英超嘅中游球隊韋斯咸，可惜開季以嚟球隊戰績惡劣，更加身陷護級戰。去到一場面對曼城，因為借用條款關係唔可以登場，結果球隊好自然派出後備門將阿祖安卡斯迪路出場。雖然球隊輸波，但係阿祖安卡斯迪路作出咗多次撲救，令人印象深刻。阿祖安卡斯迪路自此亦成功奪回正選位，祖赫特悲慘地成為球隊二號門將，及後亦都較少機會登場。偏偏祖赫特退居後備之後，球隊成績越嚟越好……係巧合？定係祖赫特嘅問題？
今季祖赫特正式轉會般尼，離開效力咗好耐、成名地嘅曼城。可以好似港超球會理文首會歌咁：「爭氣！重新出發！」。今次祖赫特守得唔錯，可惜球隊狀態低沉兼失波超多，上一季般尼堅隱嘅防守已不復再……領隊戴治喺十二月尾就試吓轉用希頓把關，點知一上場就成功2:0擊敗韋斯咸，之後一路用希頓都冇喺聯賽輸波，仲要作客成功逼和曼聯。既然順開，領隊就梗係唔變。更慘嘅係，隨著上季表現出色嘅普比復出，普比亦佔領咗盃賽龍門呢個位置，祖赫特完全再冇出場機會……

呢幾年，祖赫特都幾黑仔吓。之前兩年佢打得唔太好，失去正選都有啲理由。今年佢已經打得算好，穩打穩紮，應該救到嘅都救到，但係球隊成績就好差。奇怪嘅係佢一冇正選，般尼反而越戰越勇，經過連番搶分，護級壓力已經大減。唔好再講咩重返國家隊，連般尼都冇你嘅位置，咁搞法隨時唔落去踢英冠，都要轉去美職、日職呢啲水平比較低啲聯賽延續足球生涯！祖赫特係咪有種黑氣纏喺身上面……定係屋企風水有問題呢？祖赫特，你不如試下去見蘇民峰或者麥玲玲呢啲風水師傅，等佢哋俾啲建議你，喺屋企放番啲風水陣，等你轉下運！