傑志唔可以輸俾飛馬,否則可以提早宣佈衛冕失敗

守拙 於 22/02/2019 發表 收藏文章


今屆港超異常精彩,已經打咗接近三分之二嘅比賽,但係竟然間第一至第六都仲喺只差五分……咁五分係乜野嘢概念呢?就係只有兩場波嘅距離呀!頭六隊嘅分數咁接近,每一場波嘅賽果都會對形勢有極大嘅影響。

今個禮拜最關重要嘅一場波,大家可能會覺得係和富大埔 vs 東方龍獅。不過我就覺得香港飛馬主場挑戰傑志呢場先係最重要,因為邊一隊輸咗,根本同退出爭標行列冇分別。今輪富力(榜首,而家有廿三分)面對實力較弱嘅元朗好大機會贏波,只要富力贏波,飛馬對傑志輸嗰一方(而家一樣係十八分)就會俾富力拉開到八分。八分,就好難再追番上去啦。

傑志今屆進攻始終冇乜板斧,嚟嚟去去都只係靠費蘭度同盧卡斯嘅個人能力,只要兩個人啞火或者對手後防夠密集又無犯錯,就無辦法入到對手波。前線唔掂之餘,仲要後防守高空波嘅時候頻頻犯錯而失波,導致成績好鬼曳下,上場仲要作客慘敗。

相反,對手香港飛馬喺陳浩然接手之後成績開始穩定上揚,期間仲搞掂過東方同今周對手傑志兩大強隊!香港飛馬喺陳浩然接手之後主要先收縮後防線進行穩守,之後再搵機會長傳進行反擊,連對凱景都係咁踢。

而飛馬呢種踢法,今屆嘅傑志就最怕㗎喇。對方收縮後防線,就會令到費蘭度同盧卡斯冇空位去突破,咁就搞到傑志進攻啞火。後防應付高空波亦都持續係唔多掂,今場要面對香港飛馬,對面咁鐘意放長傳,傑志後防又應唔應付得到呢?

呢場波,邊隊都唔會想輸,但係和就會可能齊齊退出爭冠行列……你又會想係傑志定香港飛馬贏呢?

留言


請按此登錄後留言。未成為會員? 立即註冊
    快捷鍵:←
    快捷鍵:→