今日歐聯十六強首回合嘅最後一日比賽日，除左有曼城喺客場落後兩球兼打十個人之下上演驚天大逆轉之外，仲有一場由馬體會主場挑戰意甲祖雲達斯嘅比賽。
呢場比賽相當好睇，成場波都快上快落，不過馬體會就棋高一著。咁既然大家都有唔少嘅進攻機會，咁比賽分野就會落喺邊面有攻勢做得比較好。
祖雲達斯擁有Ｃ朗拿度，看似把握力會更強，所以賽前唔少人都睇好祖記。不過今日祖雲達斯排出4312，Dybala任攻中而非之前嘅右路進攻球員，唔會出波俾人頂，加上快翼度格拉斯哥斯達缺陣，亦都無出助攻力强嘅右閘簡些路……咁樣令到球隊幾乎無乜側擊能力，斬波得左閘辛祖一個，人地自然較易防守，而想玩陣地戰Dybala成日拎波上腳，亦慘被馬體會防中mark實，無辦法喺禁區頂發揮做到有效連結，搞到祖雲達斯除咗有一球罰球C朗中龍，幾乎威脅唔到馬體會。換人就更加保守到用一個進攻球員換走Dybala，而唔係增加進攻球員。
相反馬體會上半場就簡單直接，有波直接放長傳去俾啱啱傷癒復出嘅迪亞高哥斯達去衝去勇。一個哥斯達去開路，加上一個基沙文後上，就已經成功製造唔少埋門機會。下半場就更加抽起兩個放中，將基沙文放去右路，出埋利馬放喺左路，雙翼齊飛！前面再有哥利亞同摩拉達去衝，火力十足。最終完全壓住祖記黎打，成功一次又一次製造近榜嘅埋門機會，最終亦2:0贏對手。
今日馬體會佔上風，真係完全多得施蒙尼嘅有效戰術，佢再次向世人證明自己嘅能力。不過馬體會就有人就仲未證明到自己能力喇……佢叫摩拉達。佢加盟馬體會咁耐都仲未入到波……今日成功將嗰波送入網之後，慶祝埋，球證先睇VAR，再判入波無效……其實之前對皇馬已經試過一次係咁。其實佢入完波會係將所有壓力喺慶祝釋放哂，話唔定可以幫佢重搭信心。佢慶祝完再吹走番個入波，對佢心理狀況一定有啲影響。雖然提高公平性，會唔會VAR真係有啲影響到球員呢？又唔知摩拉達幾時先可以真正入到有效嘅波呢？
請按此登錄後留言。未成為會員? 立即註冊