凱景如果鬥攻，下半季有力搶分

季前大家都睇死佳聯元朗同凱景會係今屆港超嘅魚腩份子，結果元朗令大家失望喇。佳聯元朗用一班年輕球員殺出一條新血路，期間更加曾經逼和班霸傑志，啱啱亦成功逼和前列份子香港飛馬，可以話係搞到一地都係眼鏡碎。不過凱景就無令大家失望吖吓，打完港超第一循環嘅賽事竟然得一分，真正成為咗一支魚腩份子。

不過經過冬季轉會窗，相信要食凱景魚腩就無之前咁易喇！雖然凱景後防線仍然無增援，仍然需要依賴一堆後生仔。不過中前場引入嘅域陀、羅拔同許嘉樂就會為佢哋面對一啲後防線比較差嘅球隊時候有鬥攻嘅本錢！
域陀可以增強中場攔截能力，羅拔就可以增加中場活力同創造能力，而許嘉樂可以配搭安基斯同孫銘謙喺前線衝鋒陷陣。雖然面對一啲防守力比較强嘅球隊肯定仍然無辦法應付，但係面對香港飛馬、夢想Fc、理文呢類防守力比較差嘅球隊，有咗幾位有實力同經驗嘅前線球員，凱景如果夠膽放手一博，話唔定會有意外驚喜！