水貨山齊士？

曼聯最近炒左摩連奴之後，重拾魔性創出六連勝，曼聯球迷一定係好鬼開心㗎喇，不過山齊士就未必喇……因為大多數比賽佢都無份出場。
山齊士上季加盟嗰陣，曼聯球迷曾經好鬼開心㗎。因為嗰陣同曼城爭梗冠軍，曼城想簽山齊士嗰陣，竟然可以搶贏佢哋簽到番黎。不過好快就因為山齊士表現不如預期，球迷都紛紛大叫水貨。

山齊士打巴塞嗰陣就會憑速度幫手拉邊製造空位俾美斯，打阿仙奴嗰陣就會喺左路内切入組織同射門……但係以上呢啲工作隨著年齡嘅增長，山齊士速度已經無以前咁快，好難再 handle 到。

咁似乎移入中路打10號位負責禁區頂關鍵一傳會係一個出路。雖則速度減慢咗，但係佢嘅視野、創造力都仍然喺度。佢對紐卡素嗰場後備入替無耐，喺禁區頂助攻拉舒褔特入波就已經證明咗呢點。佢打10號位就可以專心組織，唔洗加速去扭去爆對手。
相信佢打呢個位負責組，再留番邊路俾後生仔爆，咁曼聯進攻會更加順暢同快。佢唔洗成日加速衝刺，亦都可以將佢嘅足球壽命延長。

唔知大家又同唔同意呢？