球員也要遇伯樂

守拙 於 12/01/2019 發表 收藏文章
Photo from 足總


香港隊周中以兩回合計5:2打敗廣東,成功衛冕省港盃,的確令唔少本地波球迷喜出望外,甚至瞓唔著教!不過興奮過後,港超聯今日再次展開序幕,打頭陣出場嘅有冠忠南區重返主場硬撼傑志。

上半場憑住迪亞高同夏志明各入一球,令冠忠南區成功擊敗傑志。
繼作客打和富力之後,又一場代表作,似乎今季港超爭冠唔可以計漏南區!

呢一場波又再一次證明迪亞高係今季南區最正確嘅收購!以往迪亞高打香港飛馬同和富大埔嘅時候,兩隊球迷都經常抱怨佢上腳太多,拖累進攻節奏。咁佢之前效力嗰兩隊取態係鐘意主動啲,加上隊內有比較多進攻球員,進攻嗰陣需要多啲互相配合。迪亞高就經常比較獨食一啲,球迷嘅責怪並非毫無道理。

反而黎到冠忠南區,球隊取態比較保守,經常收縮防守區域,學足摩連奴咁泊大巴!前場進攻就依靠進攻球員自己個人能力去進行一啲反擊,咁反而唔需要太多配合,對面攻咗上黎就會有啲空位,迪亞高可以一拎到個波用自己能力就去向前衝去扭,發揮哂佢嘅優點出黎。今季黎到南區,迪亞高終於揾到一個啱佢發揮嘅地方,更加有比賽係靠佢個人能力而拎到分數。

或者唔同球員就適合唔同嘅球隊或者戰術體系,佢哋都要遇到一個伯樂,先可以發揮得到。不過另一邊廂,曾經話過自己喺港超無對手嘅傑志教練朱志光就要諗下計喇,聯賽打完第一輪,竟然已經失咗分五次!咁嘅狀態打亞洲賽?有啲令人擔心。

留言


請按此登錄後留言。未成為會員? 立即註冊
    快捷鍵:←
    快捷鍵:→