回顧加利韋特摩下的港隊:確立主攻取態

守拙 於 12/12/2018 發表 收藏文章

金判坤離任之後,香港隊主帥位置空缺長達差唔多一年。幾經辛苦先迎黎新教練加利韋特。點知加利韋特上任僅僅九十二日,領軍僅僅五場,就宣告辭職離隊,真係成件事似笑話一樣。辭職消息一出,「反白黨」嘅前足總董事梁芷珊、陳肇麒等人都紛紛出黎抽水。

不過加利韋特大約在任短短九十二日,其實就已經喺香港隊戰術取態有頗大嘅改變。之前金判坤在任嘅時候,戰術取態好多時都係比較保守,面對北韓、甚至馬來西亞呢啲實力比香港強少,球隊都會穩守至上,唔會主動進攻對手。咁好多時候就會發生「久守必失」,即係香港隊只要突然稍為唔集中,就會鑄成大錯失波。

加利韋特就雖然排出442陣式,又傳統英式打法,但係取態明顯進取。雖然可能喺進攻套路方面仍然有待改進,但係對住實力差唔多夠膽壓上去呢環就係香港隊持續進步嘅重要一環。首先香港隊後防因為球隊主攻而壓力會大減,因為球隊肯積極向前進攻嘅時候,對手就唔會咁易攻到過黎。另外,香港就算而家有啲入藉兵都好,好快都會面臨入籍兵短缺問題,而要用番華将,普遍華人球員身體素質比較差,主攻、保持控球在腳嘅踢法相比隱守再放長傳反擊,相對上可以避免到同對手有埋身肉博輸蝕嘅情況。如果長遠發展主攻、保持控球在腳嘅踢法就可以令香港隊成績穩步上揚。

加利韋特用五場波改變球隊心態,確立咗主攻嘅踢法。如果下任教練係主張主攻兼短傳嘅踢法,相信會係件好事。不過要知道下任香港隊教練係邊個,相信以足總招聘嘅速度,又要等番至少半年咁喇?

留言


請按此登錄後留言。未成為會員? 立即註冊
    快捷鍵:←
    快捷鍵:→