盧卡古與盧卡斯 精選

大家見到標題應該會R哂頭，英超曼聯嘅前鋒盧卡古同傑志外援盧卡斯應該大檻都扯唔埋，點解會一齊講呢？唔通佢哋係識於微時？有啲港超外援球員就真係識啲大球星，不過唔係呢個組合喇。咁一齊講就一定有原因嘅。雖然天各一方，但係其實無論打法同生涯走向都有啲相似嘅地方。
不如先講吓佢哋嘅生涯走向

1.由效力大球會變效力中型班球隊

盧卡古：

效力英超大球會車路士拎唔到啲乜出場機會，轉而改為效力中型班嘅愛華頓。

盧卡斯：

效力港超當時大球會南華企唔穩正選，幾番波折再番黎香港效力中型班和富大埔。

2.喺中型班球隊大放異彩
盧卡古：

去到愛華頓之後成為主力，入球無數，更加破名宿鄧肯費格遜紀錄，成為球會史上入波最多球員。

盧卡斯：

去到和富大埔到成為絕對主力，前線靠哂佢，仲要菁英盃決賽入波幫大埔捧盃添！


3. 獲得強隊賞識收歸旗下

盧卡古:

上季伊巴受傷之後，摩連奴急於搵一個高大中鋒代替佢，結果簽入盧卡古。

盧卡斯：
傑志喺棄用巴倫古素之後，一直都未搵到合適嘅外援前鋒。見2016/2017球季盧卡斯咁勁，季尾即刻撬佢過檔。


4. 頻頻失機

盧卡古同盧卡斯去到強隊之後不時浪費入球機會，兩者都有俾網民剪輯啲射失片段放上網瘋狂恥笑。


盧卡古同盧卡斯除咗以上生涯路向似之外，打法都似，兩者都係衝擊型前鋒，好需要空間發揮。打中型班固然啱哂佢哋胃口，因為任何球隊對住中型班都會覺得自己有機會贏，咁一定唔會死守而會攻上去。對方後防線唔會受縮，佢哋一拎到個波，由於有大把空間，就唔洗點諗，直接向前衝，面對個兩三個後衛，用自己嘅速度同體格去爆對手好易搞掂。
去到強隊，對手就會收縮防守區域，對面有六個、七個後防泊喺後面，憑一人力量硬衝完全無可能衝得散。面對呢啲密集，球隊就要慢慢組織去破密集，而打慣反擊嘅直接足球，就明顯唔慣呢一種打法。成日唔出黎現位幫球隊組織，出到黎幫手組織俾波啲力水又錯哂，走位走走吓成日都會去咗邊路，成日同球隊格格不入之餘，有埋門一腳又經常射失，成為眾矢之的。

今季盧卡斯開始番生咁，係因為對手開始唔當傑志係勁旅，無再死守，會壓迫同攻上去，令到有空間俾盧卡斯發揮番，咁正正係啱哂佢胃口。或者一個球員喺唔同環境同球隊戰術之下，表現會有所不同。唔係佢喺某隊入得多波，去到第二隊就一定一樣咁成功！