拉舒褔特表現不進則退？ 精選

拉舒褔特今季改著10號波衫，唔少球迷都質疑佢有乜資格着一個通常曼聯傳奇球員先會著嘅冧把。咁講真10號之前由舒寧咸、朗尼同伊巴呢啲球星著，以拉舒褔特呢刻嘅實力又的確比唔上。
佢尋日第一次著件10號波衫落場，表現都頗為強差人意。拉舒褔特成場波走位時機經常出錯，成日企左喺越位位又唔出番黎。加上佢打前鋒位唔做支點嘅工作，有波就直接向前衝，睇落去表現完全唔似配著得起10號嘅波衫。之不過大家仲記唔記得拉舒褔特第一次喺英超出場、初初出道嗰時呢？

15/16球季下半段，曼聯大部份進攻球員受哂傷，得番迪比一個可以擔任嘅前鋒嘅球員，而陷入前鋒荒。迪比表現亦惡劣，結果對阿仙奴嘅英超大戰時任教練雲高爾竟然起用從未喺英超登場嘅拉舒褔特掛帥擔任正前鋒。未開波嗰陣唔少曼聯球迷都以為場波輸咗九成，結果拉舒褔特梅開二度幫曼聯擊敗勁敵阿仙奴。嗰陣時嘅拉舒福特並唔獨食，有極高嘅合作性，拎到波會停到波，做到支點，唔會好似而家咁一味亂衝。縱使之後未必成日入到波，但做到支點停波、肯同拍檔馬斯亞配合可以幫助到球隊進攻，反擊嘅時候亦可以憑佢嘅速度威脅對方後防。各項細節亦都越做越好，不停進步，季尾更加喺曼市打吡大放異彩，令唔少球迷開始拎佢同C朗初出道嗰陣比較。

自從教練由雲高爾變咗摩連奴之後，拉舒褔特就開始變得獨食，有波就直接向前衝，甚少同隊友做配合。拉舒褔特除左處理罰球有進步之外，無進步不特止，仲要退步。究竟點解會咁樣？或者同教練有關喇。雲高爾當時嘗試打造控球在腳，希望以短傳去撕破密集，咁會要求球員要多啲做配合。同時提升後生仔實力亦係雲高爾長處之一，唔少球星都係由佢調教出黎。例如執教拜仁嗰陣就調教咗一個湯馬士梅拿，由一個平凡嘅後生仔經雲高爾調教兩三季，搖身一變，成為世界級前鋒。拉舒褔特跟雲高爾個陣，雲高爾知佢係後生仔，亦肯定會花左唔少時間教佢點走位、做支點。雲高爾被炒之後，摩連奴上任，摩連奴淨係識教後防球員進步，前場球員就要自動波。由於摩連奴主打防反，唔會點灌輸球員要點進攻。前面長期自動波，認為有山齊士、馬達呢啲球員係度自己搞咪得。久而久之拉舒褔特仲喺年輕球員，欠缺教練灌輸點做，啲波自己去又無人鬧，自己又開始出名唔再係细蚊仔，會想貪下功，就開始成為獨扭俠，完全獨食、走位亂黎。表現無進步之餘，更係退步。
預計唔識提升後生仔嘅摩連奴繼續領軍之下，今季拉舒褔特都只會係一個獨扭俠，表現繼續失色，仲要揹住件十號波衫，相信受嘅批評只會越黎越多。拉舒福特要持續進步，就一定要離開摩連奴先可以，否則只會沉落去，隨時一沉不起。