贏波背後問題多 港隊前路好坎坷 精選

香港足球代表隊今日晏晝喺亞運第一場分組賽3:1輕取老撾，只不過以今場表現黎睇出線形勢絕對唔樂觀，尤其同組另一場賽事中華台北成功迫和巴勒斯坦。
先講下排陣，今場教練郭嘉諾排出類似433比較進攻型嘅陣式，後防方面以出擊能力強嘅鐘偉強任左閘、余沛康作為右閘、徐宏傑同劉學銘扼守防線中路。中場方面就派出列斯奧出任6號防中位、陳俊樂擔任Box to Box 嘅工作、以及杜國榆擔任串連嘅工作。前線就有高大前鋒安永佳、佐迪同鄭展龍組成進攻三劍俠。呢個陣容排出黎看似分工清析，最尾亦順利贏到場波，但係當中就暴露咗唔少問題，以下會詳述講解。

第一，兩閘下場人選係咪需轉下呢？以前鋒鐘偉强充當左閘無疑閘位助攻能力有所增強，當安永佳入左中間都仲有人可以後上幫手拉邊。只不過防守嗰陣鐘偉強就顯得好吃力，好幾下都出犯規呢招去解決對手，亦因為平時打開前面，防守企位都經常出現問題。下場不如調番佢上前面喇，以同樣後上能力強，但防守力更強嘅姚浩明可能更好。而余沛康亦同樣喺閘位表現患得患失，攻守都唔掂，下半場俾謝朗軒入替直情係可以預料到嘅事。
第二，列斯奧打防中壓得太上。列斯奧打防中派牌同截波真係一流，同時亦可以以佢經驗帶到班後生仔。稍嫌佢喺球隊進攻嗰時企得太前，一俾人打反擊就番唔切黎，好彩對手實力弱啲攻擊先無乜威脅，下一場對實力都有番咁上下嘅中華台北就要留意吓喇，再壓咁上隨時出事。

第三，進攻套路單調。成場波港隊都係不停長傳，無乜組織可言。不斷長傳搵佐迪，對弱隊就對面下下都頂輸啫，對番強少少d隊人地都會有針對性佈處喇。今日其實好多機會可以入波，啲second ball好多都把握唔到，搞到最尾入得三球。遲下個幾場就咁踢嘅話，對手強咗，射門機會又會少咗。咁嘅把握力，真係好為港隊擔心。另外今場進攻套路單調之餘仲要前線冇乜配合、決定又慢，連單刀都慢慢黎……贏只不過靠本身球員質素比對方好咁解，唔係因為球員發揮得好。
第四，球員唔可以鬆懈，係任何一刻都唔可以。今場領先2:0嗰時就係防守球員一不留神就俾人追番粒，對手追番一球之後氣勢如虹，更加令到港隊之後一度受壓。之後對嘅對手更强，唔可以再有類似犯錯。

下一場對手係中華台北，同港隊實力接近，只係港隊稍強少少。只要若果港隊輕敵或者大意犯錯，係絕對有可能失分。我建議下場港隊將陣容改成4231，務求不斷創造機會，強攻中華台北。派出徐宏傑、謝朗軒任兩閘改善閘位問題，中堅用劉學銘拍列斯奧，防守中場派出胡晉銘、陳俊樂去提供活力，攻中由於鄭展龍受傷，就一定要用林嘉緯。另外再派出鐘偉強、羅曉聰同佐迪前線攻堅。我認為呢個陣活力會十足、撕破力亦有保證，但當然郭sir會自己排一個佢覺得適合嘅陣喇，至不過要解決今場波啲問題都有排搞。以上只係我個人意見，大家可能睇到嘅嘢會唔一樣。無論如何，希望港隊之後一直順利殺入決賽，香港人請齊撐港隊！