阿仙奴增兵行動好成功，其他英超列強仍需努力 精選

今個轉會窗喺英超方面係會提早開季之前閂門，但係大部份英超列強球隊增兵動作無加快之餘，仲要都似乎比較怠慢，少收購至於仍然未能夠解決球隊弱點。
曼城嘅防中費蘭甸奴回緊塘之餘，根本無正宗嘅防中替補，之前曼城嘗試收購佐真奴同比真歷去填補球隊呢個弱點，但係曼城暫時都未成功收購到任何防中;曼城同市宿敵曼聯就急需要解決中堅級數不足同埋無右路進攻球員嘅問題，但係曼聯到而家為止比較重榜嘅收購都只係收購左一個質素一般嘅費特去增強中場板凳深度，亦未能清走後防質素一般嘅洛荷同鐘斯。傳聞中會加盟嘅哈利麥佳亞同埋列比錫，近期都無進一步嘅消息，而家未有任何正式收購係針對球隊嘅不足；熱刺方面就唔洗多提，因為係連一個正式收購都未有;車路士喺沙利執教下明顯陣式將會轉為433，亦都買左佐真奴去派牌，但係夏沙特同古圖奧斯嘅去留問題仍然未能夠解決;比較積極嘅利物浦就簽入唔少好球員去加強球隊，但係簽唔到法基亞之後，仍然未有簽入一個組織力強嘅中場，唔通新一季靠軒達臣派牌？
至於今個夏天轉會操作最成功嘅英超列強，暫時非阿仙奴莫屬！首先主力龍門施治開始年紀大，狀態亦有啲下滑，上季都派左啲膠，包括作客對陣史雲斯時嗰陣直接傳左個波俾對手，都係時候要揾接班人，阿仙奴亦成功喺利華古遜度買左年輕嘅德國門將蘭奴。蘭奴上幾季喺德甲都表現出色兼稳定，加上仲後生有進步空間，相信有佢喺度阿仙奴未來都唔洗擔心龍門呢個位置喇。俾阿仙奴球迷成日話嘅比爾連同梅斯達菲對上兩季狀態都比較漂忽，阿仙奴亦搵黎咗擁有豐富經驗利恩斯坦拿同帕帕斯塔索普洛斯去解決球隊呢個弱點。最後由於球隊無純防中，長期要用夏卡打嘅問題亦因為球隊簽入咗白簡迪杜雷拉而解決左，夏卡可以淨係負責後場派牌嘅工作，而杜雷拉就負責掃蕩嘅工作。相信中場防守力會比起上一季只係放兩個都組織型嘅夏卡、韋舒亞效果更好。前場本身已經有奧斯爾、奧巴美揚呢啲一線進攻球員，唔收購人亦都好合理。阿仙奴收購球員係針對自己球隊弱點之餘，收購速度亦好早完成，最重要有時間俾球隊去磨合，相信新一季阿仙奴有機會重新殺入英超前四。
綜合黎睇得阿仙奴一隊可以話係完成補強，至於其他列強相信要快啲加快行動去收購球員喇。
。