大灣區聯賽不切實際

守拙 於 23/07/2018 發表 收藏文章

香港足總主席話中國足協正籌備大灣區聯賽,查實現階段籌備中嘅大灣區聯賽只屬業餘聯賽,籌備者更非中國足協。就算要籌備一個職業嘅大灣區聯賽,而香港派精英隊參賽亦係不切實際,以下會講下點解。

首先,根本唔會提升到香港足球水平。先諗下大灣區有乜球隊係實力比港超啲球隊水平高嘅?恐怕就只有廣州恆大同廣州富力兩隊,就算俾你切到一個大灣區職業聯賽出黎,呢兩隊會唔會傻到棄戰多人睇多人關注嘅中超黎參加呢個聯賽呀?就算參加咪派啲二隊黎,其他球隊就係一啲可能中乙水準都無嘅球隊,試問對住呢啲九流球隊,球員有乜可能進步到,水平點提高呢?

其次,配套不足你玩乜都無用。就算真係大灣區聯賽搞到職業聯賽,俾你威到有哂富力恆大一隊係度玩,你派香港球隊入去玩就真係提升到香港足球水平?你入完去玩,但係平時訓練配套設施繼續不足,日日未練完波就俾康民署啲阿姐仔趕,仲要訓練質素又唔夠好,青訓方面又繼續做唔好,咁樣入到有水平聯賽玩去玩,足球水平都好難提高。

加上,你想無咗香港隊咩?亞洲賽隨時都無得玩?大灣區聯賽?乜FIFA有個會員叫大灣區咩,咁搞係咪想無咗香港隊?所謂大灣區聯賽又會得到FIFA認證咩?要搞所謂大灣區聯賽根本會產生好多唔同問題,不過搞個大灣區盃賽或者可能嘅。如果有個大灣區盃賽,可能香港可以派啲無得打亞洲賽球隊出去同唔同球隊接觸下,又體驗多啲真正作客嘅滋味,咁長遠可能真係對香港足球有某方面嘅進步嘅。

綜觀黎講,主席你咪諗埋啲無謂野,諗辦法去改善要發展足球嘅基礎配套,再做啲長遠規劃去令香港足球再上層樓喇!

留言


請按此登錄後留言。未成為會員? 立即註冊
  • ryankwok 於 23/07/2018 評論 NO. 1

    班仆街只係為左擦鞋

  • Wai Kei Chan 於 24/07/2018 評論 NO. 2

    要拍上面北大人馬屁,每係大灣區既野就是最好的

快捷鍵:←
快捷鍵:→