大埔進攻下季有望改善？ 精選

和富大埔上季最終喺菁英盃、聯賽同足總盃都鬥唔過傑志之下，以三亞王去結束球季。雖然一個冠軍都無，但係成績總算唔錯。成績好自然球員易俾人掘走，迪亞高、陳俊樂同埋袁振昇都已經先後離隊他投，而迪亞高同袁振昇兩個可以做到前場做到支點嘅球員都走哂，相信大埔球迷都好心急球隊會點解決呢個問題。
啱啱大埔就確定由菲律賓球隊借入有1米95身高嘅澳洲高大中鋒 Harrison Sawyer。翻查資料，Harrison Sawyer 雖然高，但係速度快，禁區頂停波技術都有番咁上下，之前喺澳職預備組都入唔少波，當然佢只係21歲，仲有進步空間。但係以佢嘅身體素質同能力喺港超取得成功，唔係難事。相信佢嘅踢法同能力足夠成為大埔嘅支點，從而可以幫助到擅於後上插入嘅大埔大紅人伊高沙杜尼。

上季大埔其實好多時前場都只係用黃威同伊高沙杜尼，兩個都擅於後上插入嘅球員，但係又冇支點幫到佢地搞到啲進攻拖泥帶水，好多時候只不過靠對手低級犯錯，或者把握死球機會而入。希望新一季大埔進攻再做得好啲去挑戰一下傑志，等港超聯唔洗一支獨大。