夢想Fc 簽希堅奴有乜企圖？ 精選

夢想已經公佈咗今季嘅陣營，有前元朗巴西外援中鋒希堅奴、西班牙防中馬高斯、上季效力飛馬嘅林樂勤等等球員加盟，以陣容黎睇，下季好大機會使用4人後防嘅陣式。
上季上半段夢想長期使用3511陣式，以借將鄭展龍成為核心做個攻勢連接人，拿祖做支點，林衍廷、祖亞昆負責入楔，多次憑住呢個套路打出漂亮嘅進攻組織入波，上半季完嗰時更加壓住大埔、東方呢啲勁旅排第三。到咗下半段鄭展龍俾傑志收番之後，突然間冇咗個鄭展龍呢個攻勢連結人，又冇人做到呢個角色，球隊入球數字大減至於更加連敗多場，最尾跌到排第九結球季。

新一季都無引入呢類球員，擅打翼衛嘅羅梓駿又俾傑志收番，應該打唔到3511架喇，唔通用新黎嘅謝敏榮打翼衛咩，係嘅話小心俾人告虐老。新一季中場中啲新將北村祝、馬高斯都唔似創造力高嘅球員，組織力繼續欠奉，但係有希堅奴同拿祖兩個柱躉式中鋒，又有兩個林樂勒我估計新一季夢想應該會使用442陣式。使用442陣式透過兩個唔錯嘅翼鋒不斷傳中，再依靠兩個高大中鋒不斷去湧博亂去製造入波，咁咪就可以隱藏咗球隊組織力不足嘅問題囉。
當然以上全部只係我個人嘅推測，真實係唔係咁要到時先知。但係長期依靠傳中戰術都唔係出路，夢想要再打番上季上半季咁華麗嘅進攻足球，始終需要一個創造力高嘅中場，希望夢想可以儘快搵到一個咁嘅球員。